حەماس ھەر ڕێککەوتنێک بەبێ کشانەوەی تەواوەتی ھێزەکانی ئیسرائیل ڕەتدەکاتەوە

دانوستانەکانی دەوحە لەبارەی ڕاگەیاندنی ئاگربەست لە غەززە بەبێ بزووتنەوەی حەماس بۆ ڕۆژی دووەم بەردەوامە، حەماسیش ھەر ڕێککەوتنێک بەبێ کشانەوەی تەواوی ھێزەکانی ئیسرائیل ڕەتدەکاتەوە.
دانوستانەکان بە بەشداری ئەمەریکا، و میسر، و قەتەر و ئیسرائیل و بەبێ ئامادەبوونی نوێنەر حەماسە.
حوسام بەدران ئەندامی مەکتەبی سیاسی بزووتنەوەی حەماس ڕایگەیاندوە، بزووتنەوەکەیان ھەر ڕێککەوتنێک بەبێ کشانەوەی تەواوی ھێزەکانی سوپای ئیسرائیل لە کەرتی غەززە ڕەتدەکاتەوە، وتیشی، دەبێت سەرجەم ئاوارەکان بگەڕێنەوە شوێنی خۆیان.
ھاوکات، جۆن کیربی وتەبێژی ئەنجوومەنی ئاسایشی نەتەوەیی ئەمریکا ڕایگەیاند، دانوستانەکانی دەوحە سەرەڕای ئامادە نەبوونی نوێنەری حەماس، بە شێوەیەکی ئەرێنی بەڕێوەدەچن و میسر و قەتەر بە نوێنەرایەتی حەماس نێوەندگیری دەکەن.
جۆن کیربی ڕاشیگەیاندوە، کارێکی زۆر ماوە بۆ گەیشتن بە ئاگربەست لە کەرتی غەززە، بە لەبەرچاوگرتنی ئاڵۆزی ڕێککەوتنەکە و ڕەوشەکە.