تەندروستی عیراق هۆشداری لەنەخۆشی ئاوەڵەی مەیموون دەدات

بڵاوبوونەوەی خێرای نەخۆشی ئاوەڵەی مەیموون لە دەیان وڵات وای لەڕێكخراوی تەندروستی جیهانی كردووە، باری لەناكاوی تەندروستی لەسەر ئاستی وڵاتانی جیهانی رابگەیێنێت.
لای خۆشیەوە وەزارەتی تەندروستی عیراق تەئكیدی لەگرنگی ئەو هۆشدارییەی رێكخراوی تەندروستی جیهانی كردووەتەوەو لەراگەیەندراوێكدا تەئكیدیكردووەتەوە لەوەی باری لەناكاو بەهۆی بڵاوبوونەوەی نەخۆشی ئاوەڵەی مەیموون لەسەر ئاستی عیراق راگەیاندووە، ئەمەش وەك مەترسییەكی راستەقینە لەسەر تەندروستی هاووڵاتیان، باسی لەوەشكردووە: سەرجەمە زیارەتكار و گەشتیاران لەفڕۆكەخانە و دەروازە نێودەوڵەتیەكان پشكنینی تایبەت بەڤایرۆسەكەیان بۆ ئەنجام دەدرێت.
كۆتایی هەفتەی رابردوو بۆ یەكەم جار لەدەرەوەی وڵاتانی ئەفریكا، لەوڵاتی سویدی سەربەیەكێتی ئەوروپا حاڵەتێكی تووشبوون بەنەوەی نوێی ئاوڵەی مەیموون تۆماركرا، هەروەها رۆژی هەینی سێ حاڵەتی تووشبوون بەڤایرۆسەكە لەپاكستان تۆماركرا، رێكخراوی تەندروستی جیهانی باری نائاسایی بۆ روبەروبوونەوەی ڤایرۆسەكە راگەیاندووە، تەنها ئەمساڵ لەوڵاتانی ئەفریكا 18 هەزار و 737 تووشبووی ئاوڵەی مەیموون تۆماركراوە كە 541 یان مردوون.