جۆوبایدن: هێشتا ئاگربەستی غەززە ئەگەرێکی بەهێزە

سەرۆکی ئەمریکا رایگەیاند، هێشتا ئاگربەستی غەززە ئەگەرێکی بەهێزە و هیچ لایەنێک بۆی نییە کار لەسەر لەباربردنی هەوڵەکانی ئاشتی بکات.
جۆوبایدن سەرۆکی ئەمریکا راشیگەیاند، دانوستانەکانی ئاشتی غەززە بەڕێوە دەچن و هێشتا راگەیاندنی ئاگربەست ئەگەرێکی بەهێزە، وتیشی: کۆڵنادەن تاوەکو دانوستانەکانی غەززە بە نێوەندگیری وڵاتەکەی و قەتەر و میسر ئەنجامی دەبێت .
پێشتر، و دوای کۆتایهاتنی کۆبوونەوەکانی دەوحە، جۆبایدن سەرۆکی ئەمریکا رایگەیاندبوو، رێنمایی تیمەکانی دانوستاندنی کردووە، پێشنیازی نوێی ئەمریکا بۆ نزیککردنەوەی حەماس و ئیسرائیل بەرەو پێش ببەن، و بە تەلەفۆنیش لەگەڵ تەمیم بن حەمەد میری قەتەر و عەبدولفەتاح سیسی سەرۆکی میسر قسەی کردووە و ئامادەکاری بۆ رێککەوتنی غەززە دەکەن.
سەرۆکی ئەمریکا ئاشکراشیکردوە، ئەنتۆنی بلینکن وەزیری دەرەوەی وڵاتەکەی دەنێرێتە رۆژهەڵاتی ناوەڕاست بۆ ئەوەی هاوکاری تیمە دیپلۆماسییەکان بکات لە بەرەوپێشبردنی هەوڵەکانی ئاگربەستی غەززە .