پێشنیازکراوە ناوچەی حەفتەغار بکرێتە ناحییە

لەسەر پێشنیازی پەرلەمانتارێک ناوچەی حەفتەغار دەکرێتە ناحییە و هەنگاوی یەکەمین بۆ بە ناحیەکردنی هەڵگیراوە.
لەوبارەیەوە دیلان غەفور ئەندامی فراکسیۆنی یەکێتیی لەئەنجومەنی نوێنەرانی عێراق رایگەیاند: هەنگاومان بۆ بە ناحییەکردنی ناوچەی حەفتەغار دەستپێکردووە و  وەک یەکەم هەنگاویش گفتوگۆمان لەگەڵ محەمەد تەمیم وەزیری پلاندانانی عێراق کردووە.
وتیشی، حەفتەغار ناوچەیەکی گرنگ و گەورەی سنوری قەزای داقوقە، هێنانەکایەی ناحیە پێویستی بە ڕێکاری ئیداری و یاسایی و پاڵپشتی خەڵکی خۆشەویستی ناوچەکە هەیە.
بەوتەی دیلان غەفور، بۆ بەناحییەکردنی حەفتەغار پڕۆژە پێشنیازێک ڕادەستی ئەنجومەنی پارێزگای کەرکوک دەکات بۆ دیراسەکردن و پەسەندکردن، پاشان تەواوکردنی ڕێکارەکانی دیکە.
ناوچەی حەفتەغار کەوتووەتە باشوری رۆژئاوای داقوق و لەگوندەکانی ( دارا، مەنسوڕ و عەلی) پێکدێت.