ئێران: 200 مووشەکمان ئاراستەی ئيسرائيل کردووە

ميديای رەسمی  ئێران بڵاویکردەوە، تاران لە هێرشەکەی شەوی رابردوودا  200 مووشەکی ئاراستەی ئیسرائیل کردووە.

ئێران لە رێگەى میدیاى رەسمی وڵاتەکەیەوە رایگەیاند، هێرشە مووشەکییەکەی بۆ سەر ئیسرائیل کۆتایی پێهێناوە، لەکاتێکدا ئیسرائیل و ئەمریکا بەڵێنیان دا، وەڵامی هێرشەکە بدەنەوە.

واشنتنۆنیش رایگەیاند، لەگەڵ ئیسرائیلی هاوپەیمانی کاردەکەن بۆ دڵنیابوون لەوەی ئێران رووبەڕووی دەرئەنجامی سەخت دەبێتەوە بەهۆی هێرشەکەوە.

پێشتریش ئیسرائیل رايگەياند " تاران بە نزیکەی 180 مووشەک وڵاتەکەی کردووەتە ئامانج و زۆرینەی ئەو مووشەکانە رێگرييان لێکراوە بگەنە خاکی وڵاتەکە".

لە پاش هێرشەکانی شەوی رابردووی ئێران بۆسەر ئیسرائیل،  بەرەبەیانی ئەمڕۆ، ئیسرائیل بۆردوومانەکانی بۆ سەر گەڕەکێکی باشووری بەیروت و قوتابخانەی مەسقەت لە گەڕەکی ئەلتوفا لە رۆژهەڵاتی غەززە، دەستپێکردو تاوەکو ئێستا شەش کوژراو و 17 بریندار هەن.