قوباد تاڵەبانی: یەکێتی چاوی لەوەیە بە بەشداری ژنان و گەنجان لەم هەڵبژاردنەدا سەرکەوتنی گەورە تۆماربکات

قوباد تاڵەبانی: یەکێتی چاوی لەوەیە بە بەشداری کاریگەری ژنان و گەنجان لەم هەڵبژاردنەدا سەرکەوتنی گەورە تۆمار بکات

قوباد تاڵەبانی، لێپرسراوی مەکتەبی سکرتارییەتی سەرۆک مام جەلال لە کۆبوونەوەی لەگەڵ سەرۆک تیمەکانی ژنانی کەمپینی هەڵبژاردنەکانی یەکێتی لە دەڤەری راپەڕین رایگەیاند لە چەند هەڵبژاردنی رابردوودا بەشداری ژنان و گەنجان لە ئاستێکی لاوازدا بوو، بەڵام لەم هەڵبژاردنەدا یەکێتی بە گەڕاندنەوەی هیوا، چاوی لەوەیە  بە بەشداری کاریگەری ژنان و گەنجان لەم هەڵبژاردنەدا سەرکەوتنی گەورە تۆمار بکات.
قوباد تاڵەبانی بە ئاماژەدان بە دۆخی هەموو لایەنەکانی بەشدار لە هەڵبژارندا، روونی کردەوە کە لایەنەکانی دیکە کەرەستەی پێویستیان نییە بۆ حکومڕانی و تەنانەت یەکێتی بەر لە چوار ساڵیش لە دۆخێکی هاوشێوەدا بوو و کەرەستە و توانای پێویستی نەبوو بۆ چاکسازی و راستکردنەوەی رێڕەوی حکومڕانی.
وتیشی، بەڵام لە سێ ساڵی رابردوودا لەژێر سەرکردایەتی بافڵ جەلال تاڵەبانیدا، یەکێتی بەردەوام خەریکی خۆڕێکخستنەوە  و خۆبەهێزکردن بووە و لە جێبەجێکردنی هەموو بەڵێنەکانیدا سەرکەوتوو بووە، هەر لە دروستکردنەوەی هاوسەنگی هێزەوە تا دەگاتە گۆڕینی یاسای هەڵبژاردن و سەرکەوتن لە هەڵبژاردنەکانی ئەنجومەنی پارێزگاکان و دانانی پارێزگارێکی یەکێتی بۆ کەرکوک.
قوباد تاڵەبانی راشیگەیاند لە دوای ئەم خۆڕێکخستنەوەیە، ئێستا یەکێتی هەموو کەرەستەیەکی لەبەردەستدایە و ویست و ئیرادەی بەهێزیشی هەیە بۆ راستکردنەوەی رێڕەوی حکومڕانی لە هەرێمی کوردستان.
لە بەشێکی دیکەی وتەکانیدا، لێپرسراوی مەکتەبی سکرتارییەتی سەرۆک مام جەلال داوایکرد ژنانی کوردستان لە کاتی دەنگداندا بیر لەوە بکەنەوە کە لەناو هەموو هێزە سیاسییەکانی کوردستاندا، کام لایەن، چ لە رابردوو و چ لە ئێستادا بەرگریکاری مافەکانی ژنان بووە و دەشتوانێت لە داهاتوودا دۆخی ژنان لە کوردستان باشتر بکات. 
قوباد تاڵەبانی باسی لەوەشکرد کە پیشتر خۆی و حیزبەکەی بەردەوام داکۆکیکاری مافەکانی ژنان بوون و لە داهاتووشدا لە هەر پۆست و پێگەیەکدا بێت بەردەوام دەبێت لە هەوڵدان بۆ باشترکردنی دۆخی ژنان.