سبەینێ دەنگدانی تایبەت بۆ ھەڵبژاردنی پەرلەمانی کوردستان بەڕێوەدەچێت

سبەینێ هەینی دەنگدانی تایبەت بۆ ھەڵبژاردنی پەرلەمانی کوردستان بەڕێوەدەچێت و ٢١٥ ھەزار و ٩٦٠ دەنگدەر مافی دەنگدانیان ھەیە.

‎بەپێی راگەیەندراوێکی کۆمیسیۆنی باڵای سەربەخۆی ھەڵبژاردنەکانی عیراق،  بۆ دەنگدانی تایبەت ٢٥١ ھەزار و ٧٠٠ وەرەقەی دەنگدان ئامادەکراوە و دەنگدەرانی تایبەتیش لە ١٦٥ بنکە و لە ٧٤٩ وێستگە دەنگ دەدەن.

ئاماژە بەوەشکراوە: بنکە و وێستگەکانی دەنگدانیش لە سەعات ٧ی بەیانی تا سەعات ٦ی ئێوارە بەڕووی دەنگدەراندا کراوەدەبن و پڕۆسەکەش درێژناکرێتەوە، چونکە کردنەوەو داخستنی وێستگەکانی دەنگدان بەشێوەی ئەلکترۆنی دەبن.

 ھەر بەپێی رێنماییەکانی کۆمیسیۆن، دەنگدان تەنھا لەڕێی بەکارھێنانی کارتی بایۆمەتری دەنگدەرەوە دەبێت و رێگە بەبردنە ژوورەوەی مۆبایل و کامێرا بۆ ناو وێستگەکانی دەنگدان نادرێت، تەنھا لەو بنکانە نەبێت کە بۆ راگەیەندکاران دیاریکراوە.

بڕیارە رۆژی ٢٠ ی مانگیش دەنگدانی گشتی بۆ ھەڵبژاردنی خولی شەشەمی پەرلەمانی کوردستان بەڕێوەبچێت و زیاتر لە دوو ملیۆن و ٦٠٠ ھەزار دەنگدەر مافی دەنگدانیان ھەیە.