نرخی دۆلار و زێڕ لە بازاڕەکانی هەرێمی کوردستان بە بەرزی ماوەتەوە

لەگەڵ کردنەوەی بازاڕەکانی دراو لە شارەکانی هەرێمی کوردستان، بەیانی ئەمڕۆ 100 دۆلاری ئەمریکی بەرامبەر بە 153 هەزار و 250 دینار مامەڵەی پێوە کراوەو نرخی زێڕیش لە بەرزترین ئاستی مێژوویی خۆیدا ماوەتەوە .
نزیکەی مانگێکە بەهای دۆلار لەبازاڕەکانی هەرێمی کوردستان لەسەروو 150 هەزار دینارەوە مامەڵەی پێوە دەکرێت، کە ئەوەش بەهایەکی بەرزە و جیاوازییەکی زۆری هەیە لەگەڵ نرخی رەسمیی دۆلار کە 132 هەزار دینارە لە بانکی ناوەندنی.
هاوکات، لە بازاڕە جیهانییەکانی زێڕ، نرخی ئۆنسەیەک زێڕ بەرزبوونەوەی بەرچاوی بەخۆیەوە بینی و گەیشتە 2 هەزار و 721 دۆلار و کیلۆیەکی کانزاکەش گەیشتوەتە 87 هەزار و 495 دۆلار.
بەرزبوونەوەی نرخی زێڕ لەماوەی کەمتر لە ساڵێکدا، لە 1ی 1ی 2024وە تاوەکو ئەمڕۆ نرخی ئۆنسەیەک لە 1984 دۆلارەوە بۆ 2721 دۆلار بەرزبووەتەوە و بەو جۆرەش هە ئۆنسەیەک زیاتر لە ٧٠٠ دۆلار بەرزبوەتەوە.
لە بازاڕەکانی هەرێمی کوردستانیش بەرزبوونەوەی زۆری بەخۆیەوە بینووە، بە جۆرێک نرخی یەک مسقاڵ زێڕی عەیاری 21 گەیشتووەتە 598 هەزار دینار.