کۆمسیۆن وردبینی بۆ وێستگە هەژمارنەکراوەکانی سلێمانی دەکات

کۆمسیۆنی باڵای سەربەخۆی هەڵبژاردنەکانی عیراق وردبینی بۆ دەنگی وێستگە هەژمارنەکراوەکانی سلێمانی دەکات، ئەمە لە کاتێکدایە رۆژی رابردوو وردبینیەکە بۆ دهۆک بوو، سبەینیش بۆ هەولێر دەبێت.

کۆمسیۆنی باڵای سەربەخۆی هەڵبژاردنەکانی عیراق دەستی بە وردبینی بۆ ئەو وێستگانەی دەنگدان کرد کە هەژمار نەکراون و پرۆسەکەش لە سێ رۆژدا تەواو دەبێت، سەرەتا رۆژی 22ـی 10ـی 2024 لە دهۆکەوە دەستیپێکرد و ئەمڕۆش لە سلێمانی و سبەینێش لە هەولێر وردبینی ئەنجام دەدرێت.

بەگوێرەى ئاگاردارکردنەوەیەکی پێشتری کۆمیسیۆنى باڵاى سەربەخۆی ھەڵبژاردنەکانى عیراق سەعات 9:00ـی سەر لەبەیانی وردبینى لە دەنگى ئەو وێستگانەی سلێمانی دەکرێت کە ئەنجامەکانیان رانەگەیەندراون.

بەپێی کۆنگرە رۆژنامەنوسیەکەی رۆژی 21/10 کۆمسیۆنی باڵای سەربەخۆی هەڵبژاردنەکانی عیراق کە بۆ راگەیەندنی ئەنجامی بەرایی هەڵبژاردنی خولی شەشەمی پەرلەمانی کوردستان رێکخرا، زانیارى دەنگى 26 وێستگە نەگەیشتوونەتە کۆمیسیۆن.
 
پرۆسەی وردبینیەکە رۆژی 22ـی 10 لە دهۆک-ەوە دەستیپێکرد و ئەمڕۆش وردبینی بۆ وێستگەکانی سلێمانی دەکرێت و رۆژی 24ـی 10ـش وردبینی بۆ وێستگەکانی هەولێر دەکرێت، کۆمسیۆن ئاگاداری سەرجەم بریکار و هاوپەیمانی حزب و چاودێرانی رێکخراوە نێودەوڵەتی و ناوخۆیی و راگەیاندنکاران دەکات کە دەتوانن لە نزیکەوە چاودێری ئەو پرۆسەیە بکەن، کە لە ناوەندەکانی وردبینی دەکرێن.

کۆمیسیۆنى باڵاى سەربەخۆى ھەڵبژاردنەکانى عێراق ئەنجامى بەرایی خولی شەشەمی هەڵبژاردنى پەرلەمانى کوردستانى بڵاوکردەوە، کە رێژەى 99.63%ى تەواوى دەنگدان بوو. 
 
پرۆسەی هەڵبژاردنەکە لە 18ـی 10 بە دەنگدانى تایبەت دەستیپێکرد و دوای 48 سەعات لە 20ـی 10 دەنگدانی گشتی دەستیپێکرد کە لەلایەن کۆمیسیۆنى باڵاى سەربەخۆى هەڵبژاردنەکانى عێراقەوە بەڕێوەبرا.