وەزیری دەرەوەی ئیسرائیل: ئەردۆغان کوشتارگەی بۆ کورد داناوە و نەتەوە یەکگرتووەکانیش نقەی نایەت

وەزیری دەرەوەی ئیسرائیل دوای هێرشەكانی توركیا بۆ سەر ڕۆژئاوای كوردستان هێرشی توند دەكاتە سەر تورکیا و نەتەوە یەكگرتوەكان.
ئیسرائیل كاتز دەشڵێت: ئەردۆغان خەریکی کوشتار و لەناوبردنی کوردانە و جیهانیش هەروا بێدەنگە، دیکتاتۆرەکە لە ئەنقەرەوە خەریکی بۆمبارانکردنی خەڵکی مەدەنیی بێگوناهی کوردە لە باکوری سوریا و سکرتێری گشتیی نەتەوە یەکگرتوەکانیش، ئه‌نتۆنیۆ گۆتێرێس نقەی لێوەنایەت".
وەزیرەکەی ئیسرائیل پرسیاری ئەوەشی کردوە، "کوانێ بانگەوازتان بۆ ئاگربەست و کۆبونەوەی خێرا و پێویستی ئەنجومەنی ئاسایش؟ کوانێ خەمخواردنتان لە مافەکانی کورد و شکاتکردن لە ئەردۆغان لەبەردەم داداگای تاوانی نێودەوڵەتیی لە لاهای؟".
باسی لەوەشكردوە، "کاتێک ئیسرائیل دژی ڕێکخراوە تیرۆرستییەکان بەرگریی لەخۆی دەکات گۆتێرێس بەردەوام هێرشدەکاتە سەر ئیسرائیل، بەڵام کاتێک هاوڕێ دژە-جوەکەی کە مەبەستی لە (ئەردۆغانە) خەریکی ئەنجامدانی تاوانی جەنگییە، لەناکاو ون دەبێت، لوتکەی دوڕویی و ڕیاکاریی دەنوێنێت".