سەرۆك بافڵ لە دەباشان پێشوازییی لە ئاندرۆ بیزلی، کونسوڵی گشتیی بەریتانیا لە هەرێمی كوردستان كرد

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازییی لە ئاندرۆ بیزلی، کونسوڵی گشتیی بەریتانیا لە هەرێمی كوردستان كرد.

لەدیدارەكەدا پێكهێنانی حكومەتی نوێ و هەماهەنگیی نێوان لایەنەكان بۆ چارەسەركردنی كێشەكانی هەولێر و بەغدا گفتوگۆیان لەبارەوەكرا و جەخت لە پێكهێنانی  حكومەتێكی خزمەتگوزار كرایەوە بەشێوەیەك ببێتە مایەی بەرەوپێشچوونی هەرێمی كوردستان و دەستەبەركردنی ژیانێكی شایستە بۆ خەڵكەكەی.

سەرۆک بافڵ جەلال تاڵەبانی هەنگاوەكانی یەكێتی بۆ پێكهێنانی حكومەتی نوێ روونكردەوە و وتی، خواست و داواكارییەكانی خەڵك بەرنامەی كاركردنمانە و هەموو هەنگاوێك لەپێناو دابینكردنی داهاتوویەكی گەشتر دەنێین، كوردستان پێویستی بە خزمەت و پێكەوەیی هەیە نەك جیاكاری و تاكڕەوی كە خۆشبەختانە كۆتاییمان پێهێنا.