بەغدا داوای هەموو داهاتی نانەوتی ئەمساڵ و قەرزەکانی ساڵی رابردوو لەهەرێم دەکاتەوە

وەزارەتی دارایی عیراق داوای هەموو داهاتی نانەوتی ئەمساڵ و ئەو قەرزانە دەكاتەوە لە حکومەتی هەرێمی کوردستان کە ساڵی رابردوو بە حكومەتی هەرێمی داوە بۆ مووچە.
سەرچاوەیەك لە وەزارەتی دارایی فیدراڵ رایگەیاند، لیستی موچەی فەرمانبەرانی هەرێم بۆ مانگی دە لە قۆناغی وردبینیدایە، لەگەڵ ئەوەشدا نوسراوێكیان رەوانەی هەرێم كردووە، بەبێ ئەوەی ناوەڕۆكەكەی ئاشكرابكرێت. سەرچاوەكە وتوشێتی، چاوەڕێی هەرێم دەكەن وەڵامی نوسراوەكەیان بداتەوە.
بەپێی زانیارییەکان، داواكارییەكەی عیراق بریتییە لە رەوانەكردنی داهاتی نانەوتی چوار مانگی رابردووی ئەمساڵ و هەروەها ئەو قەرز و پێشینانەی كە ساڵی رابردوو بە هەرێمی کوردستان دراوە بۆ مووچە كە زیاتر لە چوار تریلیۆن دینارە .
سەرچاوەكەی وەزارەتی دارایی وتیشی، داوا لە سەرۆك وەزیرانی هەرێم كراوە راستەوخۆ پەیوەندی بە سودانییەوە بكات بۆ چارەسەر كردنی ئەو كێشەیە، بۆ ئەوەی موچەی مانگی دە رەوانەی هەرێم بكرێت.