جەنگى نێوان تایسۆن و جەیک پاوڵى هاوشێوەی ئەوە نەبوو کە بانگەشەى بۆکرا!

جەنگى نێوان تایسۆن و جەیک پاوڵى هاوشێوەی ئەوە نەبوو کە بانگەشەى بۆکرا!
ئاکۆ بیبانى

ئەو شەڕەى زۆر لە هەوادارانى بۆکسێن لە جیهاندا چاوەڕوانى بوون ، ئەو جەنگەى بەیەکێک لە ساتە مێژوویەکانیان دەزانی ، بەرەنگاربونەوەى پاڵەوانێکى پێشوو و پادشاى بۆکسێنى 58 ساڵان مایک تایسۆن و جەیک پاوڵى یوتوبەر و یاریزانى بەهێزى بۆکسێن و یەکێک لە گەنجە سەرشێت و پڕ لە کێشەکانى جیهان بوو ، زیاتر لە 70 هەزار هاندەر لە نێو یاریگا ئامادەن بۆ بینینى شەڕى نێوان ئەو دوو ئەستێرەیە ، تایسۆن لە رابردوودا پاڵەوانى ژمارەیەکى جیهانى بۆکسێن بووەو هیچ رکابەرێکى نەبوو ، لەدوای زیاتر لە 20 ساڵ وازهێنان لە یارى ، جارێکى دیکە بڕیارى دا لە ڕووبەرووبونەوەیەکى مێژوویدا لەگەڵ جەیک پاوڵ بجەنگێت ، هەرچەندە هەموان و لەپێشى هەموانەوە منداڵەکانى خۆى داوایان دەکرد ئەو یارییە ئەنجام نەدات ، چونکە نابەرامبەرەو جیاوازى تەمەنیان 31 ساڵە ، تایسۆن 58 ساڵە و جەیک پاوڵیش 27 ساڵ ، ترسى ئەوەیان هەبوو لەنێو حەلەبەى بەرگرى بەهۆى لێدانى بەزەبرو کاریگەرەو ژیانى بکەوێتە مەترسییەوە ،تایسۆن  پاشای بێ مشتومڕی بۆکسێنە لەجیهاندا - دە ساڵ پێش ئەوەی پۆڵ لەدایک بێت !   هەموان چاوەڕوانن ، کات بۆ ئەو یارییە مێژوویە بەتەواوى وەستاوە ، هیچ بابەتێک گەرمترنیە لەو بەیەک گەیشتنە ، ئامادەبوانى نێو یاریگاکە بە پارەى خەیاڵى و جیاواز بلیتیان کڕى بوو ، باس لەوە دەکرێت بلیتى گەیشبووە 50 هەزار دۆلار ، لە هەشت جەولەدا هەردوو یاریزان بەرەنگارى یەکتربونەوە ، زۆر بەنەرمى پێکدادانیان دەکرد هیچ لێدانێکى کوشندە نەبینرا ، دواجاریش جەیک پاوڵ بە کۆى دەنگى داوەران  بە جیاوازى 4 خاڵ و بە ئەنجامى 74 خاڵ بەرامبەر بە 70 خاڵ بووە براوەى یارییەکە، دوای یارییەکە رەخنەکان زۆرتربوون ، چۆن دەکرێت کەسێک تەمەنى 58 ساڵ بێت دوای 20 ساڵ دوورکەوتنەوە لەگەڵ یاریزانێکى 27 ساڵ یارى بکات کە 31 ساڵ جیاوازى تەمەنیانە ؟ ئەمە لەکوێدا رێگا پێدراوە ئەگەر نمایش و شانۆگەرى نەبێت و مەبەستى یەکەم کۆکردنەوەى پارەو داهات نەبێت !
جەیک پاوڵ کە براوەى یارییەکە بوو 40 ملیۆن دۆلار قازانجى کردوە ، مایک تایسۆنى پیرە یاریزانیش 20 ملیۆن دۆلارى کۆکردەوە .
ئێستا جەیک پاوڵى گەنج دەتوانێت لە رینگەکەدا شانازى بەخۆیەوە بکات کە توانیوێتى لە مایک تایسۆنى ئەفسانە و بەهێزترین پیاوى جیهان و بۆکسێنەر بباتەوە .
مایک تایسۆن لە کۆى 50 ڕووبەرووبونەوەى پیشەگەرانەدا لە 44 یاریدا سەرکەوتنى بەدەستهێناوە ، وایین شەڕی رەسمى نزیکەی ٢٠ ساڵ لەمەوبەر لە مانگی حوزەیرانی ٢٠٠٥ ئەنجامداوە .