رزگار حاجی حەمە: بۆ پێکهێنانی حکومەت یەکێتی ئامادەی دانوستانە

رزگار حاجی حەمە ئەندامی مەکتەبی سیاسیی ی.ن.ک رایگەیاند: یەکێتی ئامادەی ئەنجامدانی کۆبوونەوە و دانوستانە لەگەڵ سەرجەم لایەنەکان بەمەبەستی پێکهێنانی کابینەی نوێی حکومەت .
وتیشی: ئێمە وەک ی.ن.ک ئامادەکاریی خۆمان بۆ دانوستانەکانی پێکهێنانی حکومەت کردووە، پێشتر کۆبووینەتەوە و ئەندامانی وەفدی دانوستانکار دیاریکراون”.
ئاماژەی بەوەشکرد: بۆ دەستکردن بە دانوستانەکان چاوەڕێی پەسەندکردنی ئەنجامەکانی هەڵبژاردنین لەلایەن کۆمسیۆنی باڵای هەڵبژاردنەکانەوە، لەدوای ئەوە دەست بە سەردانی و کۆبوونەوەکانمان دەکەین.
رزگار حاجی حەمە ئەوەشی خستەڕوو: تا ئێستا هیچ وادەیەک بۆ کۆبوونەوە لەگەڵ پارتی دیموکرات دیاری نەکراوە، بە دڵنیاییەوە ئەویش دەکەوێتە دوای پەسەندکردنی ئەنجامەکان.