ئەمڕۆ یەكێتی و پارتی بۆ گفتوگۆکردن لەبارەی
پێکهێنانی حکومەت کۆدەبنەوە و بڕیارە كۆبوونەوەكە لەسلێمانی
بەڕێوەبچێت .
قوباد تاڵەبانی سەرۆکایەتی وەفدی دانوستانکاری (ی.ن.ک)
دەکات و هەریەکە لە رێواز فایەق و رزگار حاجی حەمە ئەندامانی مەکتەبی سیاسی و
سالار سەرحەد، ئەندامی سەرکردایەتیی یەکێتی ئەندامی وەفدەکەن.
وەفدەکەی پارتی دیموکراتی کوردستانیش بە
سەرۆکایەتیی هۆشیار زێباری دەبێت و ئەندامەکانیش پێکهاتوون لە پشتیوان سادق،
ئەندامی مەکتەبی سیاسی، و دڵشاد شەهاب، ئەندامی سەرکردایەتیی پارتی و ژمارەیەک لە
ئەندامانی سەرکردایەتی پارتی.
لە چەند رۆژی رابردوودا هەردوو لایەنی یەکێتی و
پارتی سەبارەت بە پرسی پێکهێنانی کابینەی نوێی حکومەتی هەرێم چەند کۆبوونەوەیەکیان
لەگەڵ لایەنە سیاسییەکانی دیکە ئەنجامداوە .
ئەمەش لەکاتێکدایە رۆژی دووشەممەی داهاتوو
2ی کانوونی یەکەمی 2024 یەکەم کۆبوونەوەی پەرلەمانی کوردستان بەڕێوەدەچێت .
Copyright © 2020 Kirkuk Tv All Rights Reserved Designed And Developed By AVESTA GROUP