ئەمڕۆ 27 هەمین فێستیڤاڵی نێودەوڵەتی گەلاوێژ لە شاری سلێمانی دەستپێدەکات

ئەمڕۆ، 27هەمین فێستیڤاڵی گەلاوێژ بە دروشمی (لە پێناوی شکۆی وشە، گەلاوێژ بەردەوامە) لە شاری سلێمانی دەستپێدەکات، سەرۆکی بنکەکەش دەڵێت:" فێستیڤاڵەکە میوانداری  ١٢ توێژەری کورد و فارس و عەرەب دەکات و خەڵاتی زێڕین دەبەخشرێتە براوەی یەکەمی پێشبرکێی ئەدەب".
ئیبتسام ئیسماعیل سەرۆکی بنکەی گەلاوێژ رایگەیاند:" بە بەشداری چەندین میوان لەسەر ئاستە جیاوازەکانی جیهان فێستیڤاڵی گەلاوێژ دەستپێدەکات و خەڵاتەکانی فێستیڤاڵەکە لەسەر ئاستی هونەری و ئەدەبی دابەش دەکرێت بەسەر براوەی یەکەمی خەڵاتەکان".
وتیشی، " کارەکانی فێستیڤاڵەکە هەتا ٧ ی١٢ بەردەوام دەبێت، پێشانگایەکی کتێبیش دەکرێتەوە کە چەندین ناونیشانی گرنگ لە چەندین وڵات لە خۆدەگرێت، وێڕای کردنەوەی پێشانگایەک بۆ کاری دەستی ژنان".
ئاماژەی بەوەشکرد:" فێستیڤاڵەکە دوو خەڵاتی زێڕین دەبەخشێت یەکەمیان بە براوەیەکی کورد و دووەمیان بە براوەیەکی بیانی، هاوکات فێستیڤاڵەکە چەندین بابەتی شیعر و چیرۆک و رەخنە و گفتوگۆ لەسەر بابەتی فکری هەمەجۆر لە خۆدەگرێت".
فێستیڤاڵی گەلاوێژ کە هەڵگری ناوێکی نێودەوڵەتییە و ٢٧هەمین خولی خۆی ئەنجام دەدات و لەلایەن یەکێتیی نیشتمانیی کوردستان بودجەی فێستیڤاڵەکە تەرخان دەکرێت بۆ ئەمساڵیش ١٨٠ کەسایەتی ئەدەبی بەشداری فێستیڤاڵەکە دەکەن.