ئەمریكا بۆ هاووڵاتییانی له‌ سوریا: دەستبەجێ وڵاته‌كه‌ جێبهێڵن

وەزارەتی دەرەوەی ئەمریكا داوا لە هاوڵاتییانی وڵاتەكەی لە سوریا كرد دەستبەجێ و لەڕێگەی گەشتە بازرگانییەكانی دیمەشقەوە ئەو وڵاتە بەجێبــهێڵن.

وەزارەتی دەرەوەی ئەمریکا لەڕاگەیەندراوێكدا بڵاویكردەوە، وەزارەتەكە داوا لە هاووڵاتییانی ئەمریکی دەکات، دەستبەجێ سوریا بەجێبهێڵن لەکاتێکدا بژاردەی گەشتە بازرگانییەکان لە دیمەشق بەردەستن .

ئەو هاوڵاتییانەشی کە مانەوە هەڵدەبژێرن یان ناتوانن بچنە دەرەوە، پێویستە پلانی فریاگوزاریی ئامادەبکەن بۆ ڕوبەڕوبونەوەی بارودۆخە سەختەکان.

بەگوێرەی ڕاگەیەندراوەكە، پەرەسەندنی پێكدادانی سەربازیی لە سوریا ئەگەری هەیە تەواوی ئەو وڵاتە بگرێتەوە، ئەوەش وایكردوە باردۆخی ئەمنی نــاسەقامگیر و پێشبینیــنەكراو بێت.

ئەمەش لەكاتێكدایە، دوێنێ هەریەكە لە وڵاتانی ڕوسیا و ئوردن داوایان لە هاوڵاتییەكانیان كردبوو، بەپەلە و لە ڕێگەی گەشتە بازرگانییەكانەوە سوریا بەجێبهێڵن، باڵیۆزخانەی عێراقیش لە دیمەشق داوای لە هاوڵاتییانی کردبوو، ئەگەر خوازیاری گەڕانەوەن، پەیوەندی بە باڵیۆزخانەوە بکەن بەمەبەستی تۆمارکردنی ناوەکانیان.