وه‌زاره‌تی دارایی هه‌رێم لیستی 3 مووچه‌ی فه‌رمانبه‌رانی هه‌رێمی كوردستانی ره‌وانه‌ی وه‌زاره‌تی دارایی عیراق كردوه، به‌ڵام هێشتا فه‌رمانبه‌ران هیچ مووچه‌یەکیان وه‌رنه‌گرتووه‌و مووچه‌خۆران نزیكه‌ی دوو مانگه چاوهڕوانی مووچه‌ی مانگی تشرینی یه‌كه‌من.
وه‌زاره‌تی دارایی عیراق زیاتر له 10 رۆژه، 763 ملیار دیناری بۆ مووچه‌ی مانگی 10 خستۆته سه‌ر هه‌ژماری دارایی هه‌رێم، به‌ڵام تائێستا به بیانوی كورتهێنانه‌وه مووچه‌ی مانگی 10ی دابه‌شنه‌كردوه‌و ئه‌مه‌ش بایكۆتی خوێندنی لە به‌شێك له فه‌رمانگه‌كانی پارێزگای سلێمانی لێكه‌وتۆ‌ته‌وه.
لیستی مووچەی مانگەکانی 11 و 12 لە بەغدایە
له‌ڕ‌اگه‌یه‌ندراوێكی وه‌زاره‌تی دارایی و ئابووری حكومه‌تی هه‌رێمدا ئاماژه‌بۆئه‌وه‌كراوه: "رۆژی 9-12-2024، لیستی مووچه‌ی مانگی 12ی فه‌رمانبه‌ران و مووچه‌خۆرانی هه‌رێمی كوردستان، له‌لایه‌ن نوێنه‌ری وه‌زاره‌تی دارایی و ئابووری هه‌رێمه‌وه ره‌وانه‌ی وه‌زاره‌تی دارایی حكومه‌تی فیدراڵ كراوه".
ئه‌مه‌ش له‌كاتێكدایه پێشتریش وه‌زاره‌تی دارایی و ئابوری هه‌رێمی كوردستان، لیستی مووچه‌ی مانگی 11ی فه‌رمانبه‌ران و مووچه‌خۆرانی هه‌رێمی كوردستانی ره‌وانه‌ی به‌غدا كردووه، به‌مه‌ش وه‌زاره‌تی دارایی حكومه‌تی فیدراڵ لیستی مووچه‌ی مانگه‌كانی 11 و 12ی فه‌رمانبه‌رانی لایه.
بایکۆت و داخستنی ناوەندەکانی خوێندن دەستیپێکردەوە
هاوكات وه‌ڵامه‌كه‌ی محه‌مه‌د شیاع سودانی سه‌رۆك وه‌زیرانی عیراقیش بۆ فراكسیۆنه كوردستانییه‌كان له‌ئه‌نجومه‌نی نوێنه‌رانی عیراق ده‌رگای له‌سه‌ر چاوهڕوانی حكومه‌تی هه‌رێم داخست بۆ پڕ‌‌كردنه‌وه‌ی ئه‌و كورتهێنانه‌ی كه له‌مووچه‌دا هه‌یه‌و فه‌رمانبه‌رانیش له‌گه‌ڵ ئه‌وه‌ی زیاتر له 2 مانگه لهچاوهڕوانی مووچه‌ی مانگی 10 دا بوون، به‌ڵام چاوه‌ڕ‌‌وانییه‌كه‌یان درێژه‌ی كێشا بۆ مانگی 11 و 12 ش، لێكه‌وته‌كانی ده‌ستپێكردنه‌وه‌ی بایكۆت و داخستنی ناوه‌نده‌كانی خوێندنیش ده‌ستیپێكردوه.
ئه‌مه له‌كاتێكدا به‌گوێره‌ی به‌دواداچوونه‌كان، حكومه‌تی عیراق ئاماده‌یه بۆ هه‌ر سێ مانگه‌كه بڕ‌‌ی 2 ترلیۆن و 289 ملیار دینار بۆ هه‌رێم بنێرێت كه بۆ هه‌ر مانگێك 763 ملیار دینار ده‌كات، به‌ڵام حكومه‌تی هه‌رێم له‌رێگه‌ی وه‌زاره‌تی داراییه‌وه ده‌ڵێت:" بۆ هه‌ر 3 مانگه‌کە 2 ترلیۆن و 994 ملیار دینارمان بۆ مووچه پێویسته، به‌و پێیه‌ش كورتهێنانی هه‌ر سێ مانگەکە ده‌گاته 705 ملیار دینار.
مووچەخۆرانی هەرێم دوو مانگە مووچەیان وەرنەگرتووە
وه‌زاره‌تی دارایی هه‌رێم مووچه‌یه‌كی مووچه‌خۆران و وه‌زاره‌تی دارایی عیراقیش لیستی 2 مووچه‌ی مووچه‌خۆرانی هه‌رێمی لایه، به‌ڵام مووچه‌خۆرانی هه‌رێم نزیكه‌ی 2 مانگه هیچ مووچه‌یه‌كیان وه‌رنه‌گرتووه، ئه‌مه‌ش له‌كاتێكدایه نه سه‌رۆكی حكومه‌ت و نه وه‌زاره‌تی دارایی هه‌رێم هیچ روونكردنه‌وه‌یه‌كیان له‌باره‌ی دواكه‌وتنی مووچه و كاتی دابه‌شكردنی مووچه رانه‌گه‌یاندوه.
له‌گه‌ڵ ئه‌وه‌ی چه‌ند رۆژێكی دیكه هه‌رێمی كوردستانیش وه‌ك هه‌موو جیهان پێده‌نێته ساڵێكی نوێوه، به‌ڵام هه‌تا ئێستا مووچه‌خۆران ته‌نها مووچه‌ی 9 مانگیان وه‌رگرتووه‌و لهچاوهڕوانی مووچه‌ی مانگی 10 دان و مووچه‌ی دوومانگه‌كه‌ی دیكه‌شیان به‌نادیاریی ماوه‌ته‌وه.
Copyright © 2020 Kirkuk Tv All Rights Reserved Designed And Developed By AVESTA GROUP