ئەبو محەمەد جۆلانی: هێزە ئەمنییەکانی رژێمی ئەسەد هەڵدەوەشێنینەوە

فەرماندەی پرۆسە سەربازييەکانی سووريا بەڵێن دەدات هەموو زیندانە بەدناوەکانی سووریا دابخات و کۆتایش بە هێزە ئەمنییەکانی رژێمی ئەسەد بهێنێت.
ئەبومحەمەد جۆلانی فەرماندەی پرۆسە سەربازييەکانی سووريا ئەبو بە رۆیتەرزی رایگەیاندووە، بەدوای هەموو ئەو کەسانەدا دەگەڕێن کە دەستیان هەبووە لە ئەشکەنجەدان یان کوشتنی دەستگیرکراوەکان لە سەردەمی دەسەڵاتی سەرۆکی لابراوی سووریادا، جەختیشی کردەوە لێبووردنی گشتی نایانگرێتەوە.
راشیگەیاند، لەناوخۆی سووریا هەموو ئەو تاوانبارانە دەدۆزنەوەو دەیاندەن بە دادگا، داواشی لە وڵاتان کرد داواکراوانیان بۆ بگێڕنەوە تا سزایان بدەن.
ئەم داوایەی فەرماندەی پرۆسە سەربازييەکانی سووريا لەکاتێکدایە، لەماوەی چەند رۆژی رابردوودا هەزاران هاوڵاتیی سووریا رژانە ناو زیندانە دیارەکانی سووریا، بەتایبەتیش زیندانی سیدنایا، کە هەزاران کەسی تێدا زیندانیکرابوو، تێیدا چەندین شێوازی ئەشکەنجەدانی زیندانییانیش ئاشکراکرا.
وڵاتە زلهێزەکانی جیهان بە وردی چاودێریی دەسەڵاتدارانی نوێی سووریا دەکەن، هەریەک لە ئەمریکاو بەریتانیا بیر لەوەدەکەنەوە دەستەی تەحریری شام لە لیستی تیرۆر دەربهێنن.
جۆ بایدن سەرۆکی ئەمریکاش لەماوەی رابردوودا رایگەیاندبوو، ئەوان چاودێری کردەوەکانی دەستەکە دەکەن نەک قسەکانیان.