نەتەوەیەکگرتووەکان: لە دوو هەفتەدا زیاتر لە یەک ملیۆن کەس لە سووریا ئاوارە بوون

بەهۆی شەڕ و ئاڵۆزییەکانی دوو هەفتەی رابردووی سووریاوە، زیاتر لە یەک ملیۆن کەس ئاوارەبوون.
نووسینگەی هەماهەنگیی کاروباری مرۆیی لە نەتەوەیەکگرتووەکان رایگەیاند: لە سەرەتای هێرشەکانی گرووپە چەکدارەکانەوە لە 27ـی مانگی رابردوو تاوەکو ئێستا نزیکەی یەک ملیۆن و 100 هەزار کەس لە سووریا ئاوارەبوون، کە زۆرینەیان ژن و منداڵن.
پێشتریش بەرپرسانی نەتەوەیەکگرتووەکان، پێشبینییان کردبوو بەهۆی شەڕ و ئاڵۆزییەکانی سووریا و رووخانی دەسەڵاتی بەشار ئەسەدەوە ژمارەی ئاوارەکان بگاتە یەک ملیۆن و 500 هەزار کەس.
رۆژێک بەر لە کەوتنی دەسەڵاتی بەشار ئەسەد، ژمارەی ئاوارەکانی سووریا گەیشتبووە نزیکەی 280 هەزار کەس، لەوکاتەشەوە تاوەکو ئێستا رۆژ لە دوای رۆژ ژمارەی ئاوارەکان زیاتر دەبێت.