ترەمپ: کێشەکانی رۆژهەڵاتی ناوەڕاست ئاڵۆزن بەڵام چارەسەرکردنیان ئاسانە

دۆناڵد ترەمپ، سەرۆکی هەڵبژێردراوی ئەمەریکا لە چاوپێکەوتنێکی رۆژنامەوانیدا لەگەڵ گۆڤاری تایم رایگەیاند: پێشتر بارودۆخی رۆژهەڵاتی ناوەڕاست ترسناک بوو، بەڵام ئێستا باوەڕم وایە، لەو ناوچەیە هەندێک شتی بەرهەمدار روودەدەن و کێشەکان بە ئاسانی چارەسەر دەبێت.

لەبارەی شەڕی غەززەوە ترەمپ وتی: ناتەنیاهۆ متمانە بە من دەکات، پێموایە ئەوە دەزانێت من دەمەوێت ئەم قەیرانە کۆتایی پێبێت و خەڵک لە هیچ لایەک نەکوژرێت.

سەبارەت بە چارەسەری دوو دەوڵەتیی، ترەمپ جەختی کردەوە جگەلەو چارەسەرە بیرۆکەی تر هەیە، بەڵام من پشتگیری لە هەر چارەسەرێک دەکەم بۆ گەیشتن بە ئاشتییەکی هەمیشەیی بێت.

ترەمپ لەسەر ئەگەری شەڕ و پێکدادنی ئەمریکا و ئێران لەماوەی خولی داهاتووی سەرۆکایەتی خۆیدا وتی، ئەگەری هەموو رووداوێک هەیە.