رۆیتەرز: ئەسەد پێش هەڵاتنی یاریدەدەر و گەورە لێپرسراوانی وڵاتەكەی فریوداوە

لە دوایین ساتەكانی پێش هەڵاتنی لە سووریا، بەشار ئەسەد یاریدەدەر و لێپرسراوانی باڵا و كەسە نزیكەكانی فریوداوە و پێی رانەگەیاندوون، كە دەیەوێت سووریا بەجێبهێڵێت.

ئاژانسی رۆیتەرز بڵاویكردووەتەوە، شەممەی رابردوو، بەشار ئەسەد بە چەند سەعاتێك بەر لە هەڵاتنی، كۆبوونەوەیەكی لەگەڵ نزیكەی ٣٠ لێپرسراوی سەربازی و ئەمنی لە وەزارەتی بەرگری سووریا کردووە و پێی راگەیاندوون پشتیوانی رووسیا لە رێگایە، داواشی لێكردوون خۆڕاگربن دژی هێرشی گروپە چەكدارەكان، ئەوەی لێشاردوونەتەوە پلانی داناوە وڵات بەجێبهێڵێت.

رۆیتەرز ئەوەشی خستووەتەڕوو: هیچ كام لە لێپرسراوە سەربازییەكان و تەنانەت كەسوكاری نزیكی بەشار ئەسەد، ئاگاداری پلانی هەڵاتن نەبوون، بەجۆرێك شەممەی رابردوو بەڕێوەبەری نووسینگەكەی ئاگاداركردوەتەوە، دوای كارەكەی دەچێتەوە ماڵەوە، بەڵام چووەتە فڕۆكەخانە و دواتر وڵاتی جێهێشتوە.

ئاژانسەكە راشیگەیاندووە، بەشار ئەسەد داوای لە راوێژكارە رۆژنامەوانییەكەی كردووە، سەردانی ماڵەكەی بكات و وتارێك بۆ ناوبراو ئامادە بكات، بەڵام كاتێك سەردانی ماڵەكەی كردووە، بەشار ئەسەد لەوێ نەبووە.

رۆیتەرز جەختی کردووەتەوە ئێستا بەشار ئەسەد لە رووسیایە و ئەو وڵاتە مافی پەنابەری بەخۆی و كەسوكارەكەی داوە.