لە 14 ساڵی رابردوودا سووریا 54 ملیار دۆلاری لەدەستداوە

یاریدەدەری سکرتێری نەتەوەیەکگرتووەکان دەڵێت، سووریا لە ماوەی 14 ساڵی شەڕی ناوخۆیدا، 54 ملیار دۆلاری زیانی بەرکەوتووە.

عەبدوڵڵا دەرداری یاریدەدەری سکرتێری گشتی نەتەوە یەکگرتووەکان ڕایگەیاند:  سووریا لە ماوەی 14 ساڵدا 54 ملیار دۆلاری لە بەرهەمی گشتیی ناوخۆی لەدەستداوە، هۆکارەکەشی بۆ دابەزینی کۆی بەرهەمی ناوخۆ لە 62 ملیار دۆلاری ساڵانەوە بۆ 18 ملیار دۆلار دەگەڕێتەوە.

یاریدەدەری سکرتێری گشتی نەتەوە یەکگرتووەکان ئاماژەی بەوەشکرد: پێشتر رێژەی هەژاری لە سووریا 12% بوو، بەڵام ئێستا بۆ 90% بەرزبووەتەوە، هەروەها نزیکەی دوو ملیۆن یەکەی نیشتەجێبوون لە کۆی 5 ملیۆن و نیو یەکە لەناوچوون.

دەرداری ئاشکرایشیکردوە: لە قۆناغی داهاتوودا گرنگی بە پاڵپشتیکردنی دامودەزگاکانی سووریا و کەرتی تایبەت دەدرێت، تاوەکوو سووریا لە ئێستاوە دەست بە گەشەی ئابووری بکاتەوە.