بڕیاردەری فراکسیۆنی یەکێتی داواکاری بەڕێوەبەری تەندروستی سلێمانی بۆ دابینکردنی دەرمان و داواکارییەکانی نەخۆشخانەی هیوا دەگەیەنێتە وەزارەتی تەندروستی عیراق و کاری پێویستی لەبارەوە دەکرێت.
کاروان یاروەیس بڕیاردەری فراکسیۆنی یەکێتی لە ئەنجومەنی نوێنەرانی عیراق رایگەیاند: "لە هەوڵێکماندا بۆ گەیاندنی داواکاری بەڕێوەبەری تەندروستی سلێمانی بۆ دابینکردنی دەرمان و داواکارییەکانی نەخۆشخانەی هیوا لەلایەن وەزارەتی تەندروستی عیراقەوە، بە نوسراوێک لەلایەن وەزارەتەوە وەڵام دراوەتەوەو ئاڕاستەی لایەنی پەیوەندیدار کراوە".
"بەهۆی ئەوەی نەخۆشخانەی هیوا ئەزموونێکی ناوازەیە لەهەموو عێراقدا و خزمەتکردنیشی ئەرکێکی نیشتمانی و ئینسانی و خێرخوازیشە، هاوکات تەشەنەکردنێکی نائاسایی نەخۆشی شێرپەنجە لەئارادایە بۆیە هەموو هەوڵێک دەدەین ئەوەی پێمان دەکرێت لەوەزارەتی تەندروستی عیراقەوە وەدەستی بخەین"، کاروان یاروەیس وای وت.
دوای گەیاندنی داواکاری بەرێوەبەری تەندروستی سلێمانی لەلایەن بڕیاردەری فراکسیۆنی یەکێتی، بۆ دابینکردنی دەرمان و پێداویستی پزیشکی، لە نوسراوێکدا لە ئیمزای بەڕێوەبەری مەکتەبی وەزیری تەندروستی عیراقی لەسەرە، داواکارییەکە ئاڕاستەی کۆمپانیای گشتی کڕین و فرۆشتنی دەرمان و پێداویستی پزیشکی کراوە بۆ بەدەنگەوە چون و کاری پێویست.
Copyright © 2020 Kirkuk Tv All Rights Reserved Designed And Developed By AVESTA GROUP