وۆڵ ستریت: تیمەكەی ترەمپ بژاردەی هێرشی سەربازی دژ بە دامەزراوە ئەتۆمییەکانی ئێران تاوتوێ دەکات

رۆژنامەی وۆڵ ستریت جۆرناڵی ئەمریكی بڵاویكردەوە، تیمەكەی دۆناڵد ترەمپ سەرۆكی هەڵبژاردراوی ئەمریكا پێداچونەوە بە سیاسەتی وڵاتەكەی لە ڕۆژهەڵاتی ناوەڕاست دەكەن و بژاردەی هێرشی سەربازی دژ بە دامەزراوە ئەتۆمییەکانی ئێران لەژێر پێداچوونەوەیەكی جددیدایە، دەشڵێت، "تیمەكەی ترەمپ تاوتوێ چەند بژاردەیەكی دیكەش دەكەن وەك سزای ئابوری، ناردنی هێزی زیاتر بۆ ڕۆژهەڵاتی ناوەڕاست و فرۆشتنی چەكی پێشکەوتوو بە ئیسرائیل".
ڕۆژنامەكە  باسی لەوەشكردووە، ترەمپ لە پەیوەندییەکەدا، نیگەرانیی خۆی بە بنیامین نەتەنیاهۆ گەیاندووە، سەبارەت بە ئەگەری دروستبوونی قەیرانی ئەتۆمی ئێران لەماوەی سەرۆکایەتییەکەیدا.
ئاماژەی بەوەشكردووە، بەدوای پلاندا دەگەڕێت بۆ ڕێگرییکردن لەو کارە، بەبێ ئەوەی شەڕێکی نوێ هەڵبگیرسێنێت، چونکە لێدان لە دامەزراوە ئەتۆمییەکانی ئێران، لەوانەیە ئەمریکا و ئێران بخاتە ڕێڕەوی پێکدادان".