ئیسرائیل: دەستوەردان لەڕوداوەكانی سوریا ناکەین

هێرزی هالێڤی، سەرۆکی ئەرکانی سوپای ئیسرائیل لە وتارێکدا لە بەرزاییەکانی جۆلان ڕایگەیاند، وڵاتەکەی "ئێمە دەستوەردان ناکەین لەوەی کە لە سوریا ڕودەدات، ئێمە لێرەین بۆ ڕێگریکردن لە دامەزراندنی گروپە تیرۆریستییەکان لە ناوچەکەدا".
ئاماژەی بەوەشکرد، "نزیکەی هەفتەیەکە لێرەین، هۆکاری سەرەکیش ئاسایشی دەوڵەتە، ئێمە لێرەین بۆ پاراستنی سنورەکانی بەرزاییەکانی جۆلان و بەرزاییەکانی باکوری جۆلان و چیای هێرمۆن".
ئەو بەرپرسە ئیسرائیلییە باسی لەوەشكرد، "لێرە دەوڵەتێکی دوژمن هەبو، سوپاکەی تێكشكاوە، هەروەها مەترسی هاتنی گروپە تیرۆریستییەکان بۆ ناوچەکە هەیە، بۆیە هەنگاوی پێشوەختەمان ناوە بۆ ڕێگریکردن لە چڕبونەوەی تیرۆریستییەکان، بەتایبەتی گروپە تیرۆریستییە توندڕەوەکان، لە نزیک سنوورەکانی خۆمان".
ئەوەشیخستەڕو، "هیچ نیازێکمان نییە کاروباری سوریا بەڕێوەببەین، بەڵام ئێمە دەستوەردانێکی ڕەسەن و ڕاستەوخۆ دەکەین سەبارەت بە ئاسایشی هاوڵاتیانی ئیسرائیل لێرە لە شارۆچکەکانی پشتمان لە بەرزاییەکانی جۆلان، ئەمە بە شێوەیەکی پیشەیی و بە شێوەیەکی دروست و بە توندی ئەنجام دەدەین".