هەسەدە: تورکیا هەوڵی داگیرکردنی کۆبانێ دەدات بەڵام رێگەیان پێنادەین

هەسەدە دەڵێت تورکیا پابەندی ئاگربەست نەبووە و بەردەوامە لە هێرشەکانی، جەختیش دەکاتەوە کۆبانێ دەکەنە چڵکاوێک تورکیا نەتوانێت لێی دەربچێت، داواش دەکات هاوپەیمانی نێودەوڵەتی و وڵاتانی عەرەبی دژی داگیرکاریی و لەشکرکێشییەکانی تورکیا لە خاکی سوربا هەڵوێستی رونیان هەبێت.
هێزەکانی سوریای دیموکرات لە راگەیەنراوێکدا دەڵێن، لەگەڵ ئەوەی ئەمەریکا و هاوپەیمانی نێدەوڵەتی هەوڵیانداوە ئاگربەستیان لە مەنبج و تەواوی ناوچەکان ژێر دەسەڵاتیان راگەیاندووە، بەڵام تورکیا پابەند نەبووە و بەردەوامە لە هێرشەکانیان لە کۆبانێ و بەنداوی تشرین.
هەسەدە جەختیش دەکاتەوە چارەسەری کێشەکان لەڕێی گفتوگۆوە بەلای ئەوانەوە گرنگە، بەڵام رێگە نادەن و بێدەنگ ناوەستن لەبەرامبەر هەر هێرشێک بۆسەر خۆیان و گەلەکەیان بکرێت و دڵنیاییش دەدەن کە رێگە نادەن هێرشەکانی تورکیا بۆسەر کۆبانێ بەدڵخۆشی ئەوان کۆتایی بێت و بەهاوبەشی لەگەڵ گەلەکەیان کۆبانێ دەکەنە زەلکاوێک قورسبێت هێزە داگیرکەرەکانی لێدەربچن و بەدڵنیاییەوە شەڕی کۆبانێ شەڕی سەرکەوتن دەبێت.
لە کۆتایی راگەیەندراوەکەدا هەسەدە بانگەواز بۆ وڵاتانی عەرەبی دەکات و دەڵێت تورکیا بووەتە گەورەترین هەڕەشە بۆسەر یەکێتی خاکی سووریا و ئەو وڵاتە لە هەوڵدایە بە بیانوی درۆ زۆرترین خاکی سوریا داگیر بکات.