حکومەتی عیراق و گرووپەکان رێکەوتوون هێرشەکان دژی ئیسرائیل رابگرن

رۆژنامەی ئەخباری لوبنانی لە بەرپرسێکی گرووپە شیعەکانەوە گواستییەوە، گروپەکان لەگەڵ حکومەتی سودانی رێککەوتوون بۆئەوەی هێرشەکانیان بۆسەر ئیسرائیل رابگرن و لە دوورەوە و بەبێ دەستێوەردان تەماشای دۆخی سووریا بکەن.
سەرکردەیەکی بزووتنەوەی نوجەبا بە رۆژنامەکەی وتووە، رێکەوتنێک لەنێوان محەمەد شیاع سودانی سەرۆکوەزیرانی عێراق و گروپەکانی بەرەی مقاوەمە کراوە، کە هێرشەکانیان بۆ سەر ئیسرائیل رابگرن.
دەشڵێت، بەگوێرەی رێککەوتنەکە گروپە چەکدارییەکانی عێراق لە دوورەوە چاودێری دۆخی سووریا دەکەن و دەستوەردانی لە کاروبارەکەیدا نەکەن.
ئاماژەی بەوەشکردووە، ئێران لە بڕیاردان ئازادی کردوون کە چۆن مامەڵە لەگەڵ دۆخەکە دەکەن، ئێستا گروپەکان پابەندی رێکارەکانی حکومەتی عێراقن، بەتایبەت دوای رووداوەکانی سووریا.