بۆ دروستکردنی یەکڕیزی کورد لە ڕۆژئاوا مەزڵوم عەبدی لەگەڵ وەفدێکی ئەنەکەسە کۆدەبێتەوە

ئاڵدار خەلیل ئەندامی دەستەی سەرۆکایەتیی پەیەدە رایگەیاند، بۆ پاراستنی مافی کورد دەیانەوێت بە یەک وەفدی کوردی بچنە دیمەشق و لە دانوستانی سوری–سوریدا یەک تێڕوانینی کوردی هەبێت.
هەر لەچوارچێوەی هەوڵەکانی بەرپرسانی ڕۆژئاوای کوردستان بۆ بەدەمەوەهاتنی ئەنەکەسە بۆ پیشانداندنی یەکڕیزیی کورد لەگفتوگۆکانی کورد لەگەڵ حکومەتی نوێی سوریا، ئەمڕۆ مەزڵوم عەبدی، فەرماندەی گشتیی هێزەکانی سووریای دیموکرات لەگەڵ وەفدێکی ئەنەکەسە لە شاری حەسەکە، کۆدەبێتەوە.
لەبارەی ئامانجی کۆبوونەوەکەش، سەرچاوەکە باسی لەوە کرد دوایین پێشهاتەکانی سووریا، پاراستنی ناوچە کوردییەکان و یەکخستنی حزبە کوردییەکانی ڕۆژئاوای کوردستان بۆ دانوستانەکانی دیمەشق؛ تەوەرەکانی کۆبوونەوەکە دەبن.
دوای کەوتنی رژێمی ئەسەد، نێوەندگیرانی فەرەنسایی و ئەمریکایی هەوڵەکانیان چڕکردووەتەوە، بۆ نزیککردنەوەی لایەنەکانی رۆژئاوای کوردستان و دروستکردنی وەفدێکی یەکگرتووی کورد بۆ گفتوگۆکردن لەگەڵ دیمەشق، بەڵام تاوەکو ئێستا هیچ کۆبوونەوەیەکی رەسمی لەنێوان ئەنجوومەنی نیشتمانیی کورد و پارتەکانی یەکێتیی نیشتمانیی کورد نەکراوە