ئیسرائیل وردەكاری كوشتنی ئیسماعیل هەنییەی لە تاران بڵاوكردەوە

كەناڵی ١٢ی ئیسرائیلی وردەكاری كوشتنی ئیسماعیل هەنیە سەرۆكی مەكتەبی سیاسی حەماسی بڵاوكردەوە و رایگەیاند: پلانی كوشتنی هەنییە چەند مانگێكی پێویست بووە، تا دواجار بڕیاردراوە لە ئێران بكوژرێت، رونیشكراوەتەوە كە لە ژووری مانەوەی هەنیە لە تاران بۆمبێكی بچوك دانراوە، بەڵام لە كاركەوتنی فێنككەرەوەی ژوورەكە خەریك بووە پلانی كوشتنەكەی تێكبدات، چونكە هەنیە ژورەكەی بۆ ماوەیەك جێهێشتووە و ئیسرائیل ترسی ئەوەی هەبووە ژوورەكەی بگوازێتەوە، دواتر فێنككەرەوەكە چاكبووەتەوە و هەنیە گەڕاوتەوە ژورەكەی و پلانی كوشتنەكەی وەك خۆی جێبەجێكراوە.
ئەوەش لەكاتێكدایە، رۆژی دووشەممەی رابردوو وەزیری بەرگری ئیسرائیل بۆ یەكەمجار بەرپرسیارێتی وڵاتەكەی لە كوشتنی هەنیە لە شاری تاران لە كاتی رێورەسمی دەستبەكاربوونی مەسعود پزیشكیان وەكو سەرۆك كۆماری ئێران راگەیاند.