بازرگانی ھەرێم لە ساڵی 2024 دا 8 ملیار دۆلاری
بۆ هێنانی كاڵا لەدەرەوە خەرجكردووەو زیاتر لە 180 مۆڵەتی هەناردەشی بەبازرگانان
داوە، بەڕێوەبەری گشتیی بازرگانیش دەڵێت: "لەمساڵدا پسوڵەی خۆراك بەدیجیتاڵ دەكەین".
نەوزاد شێخ كامل، بەڕێوەبەری گشتیی بازرگانی
حكومەتی ھەرێمی كوردستان لەكۆنگرەیەكی رۆژنامەوانیدا ئاماری ساڵی رابردووی وەزارەتی
بازرگانی ئاشكرا كردو رایگەیاند: "لەساڵی 2024 دا بڕی 8 ملیار دۆلار بۆ هێنانی
كاڵا لەدەرەوەی هەرێمی كووردستان خەرجكراوەو كاڵاكانیش لەوڵاتانی توركیا، ئێران، چین،
ئەمریكاو وڵاتانی خلیجەوە هاوردەكراون، كەزیاتر خۆیان لەپیشەسازی كیمیاوی و كۆمەڵەی
خۆراك و كۆمەڵەی ئاژەڵ و هەموو ئەو كاڵایانەدا دەبیننەوە كە مۆڵەتی بازرگانیان پێدراوە،
هاوكات وەزارەتی بازرگانی هەر لەوساڵەدا زیاتر لە 180 مۆڵەتی هەناردەی بەبازرگانان
داوە".
راشیگەیاند: "پلانی وەزارەتمان بۆ ساڵی
2025 ئەوەیە كە نووسینگەی بەڕێوەبەرایەتی گشتی بازرگانی لەدەروازە سنوورییە نێودەوڵەتییەكانی
ئیبراهیم خەلیل، حاجی ئۆمەران، پەروێزخان، باشماخ بكەینەوەو نووسینگەكانمان لەو دەروازانە
رۆڵی بەڕێوەبەرایەتی گشتی بازرگانی بۆ پێدانی مۆڵەت بەبازرگانان ببینن".
بەڕێوەبەری گشتیی بازرگانی ئەوەشی راگەیاند:
"هەر لەمساڵدا كار لەسەر بەدیجیتاڵكردنی پسوڵەی خۆراك دەكەین و بۆ ئەو مەبەستەش
لەلایەن بەڕێوەبەرایەتی گشتی پلاندانان و بەدواداچوونی عیراقەوە لیژنەیەك لەبەغداوە
دێتە هەرێمی كوردستان و شاری هەولێر وەك نموونە وەردەگرێت و كار لەسەر بەدیجیتاڵكردنی
پسوڵەی خۆراك دەكات".
Copyright © 2020 Kirkuk Tv All Rights Reserved Designed And Developed By AVESTA GROUP