سبەینێ ئەنجوومەنی وەزیرانی هەرێمی کوردستان لەسەر پرسی موچە کۆدەبێتەوە

وتەبێژی حکومەتی هەرێم رایگەیاند، سبەینێ ئەنجوومەنی وەزیران لەسەر پرسی موچە کۆدەبێتەوە.

وتەبێژی حکومەتی هەرێم بڵاویکردەوە، بڕیارە تەواوی بڕگەکانی کۆبوونەوەی ئاسایی سبەینێی ئەنجوومەنی وەزیران، تایبەت بێت بە بابەتی دارایی و پرسی مووچە و راپۆرتێکیش لەبارەی دۆخی دارایی ساڵی 2024 بخرێتەڕوو.

باسی لەوەشکرد، بابەتی بایۆمەتری و ناردنی زانیارییە داواکراوەکان بۆ بەغدا، خستنەڕوی راپۆرتێک لەبارەی بەئەلیکترۆنیکردنی ناوەندی خشتەی مووچەخۆرانی هەرێم گفتوگۆدەکرێت.

ئەم کۆبوونەوەیە لەکاتێکدایە تا ئێستا مووچەی مانگی 12ـی مووچەخۆرانی هەرێم دابەشنەکراوە و بەغدادیش هیچ بڕە پارەیەکی بۆ ئەو مووچەیە نەناردووە.

پێشتر فازڵ نەبی بریکاری پێشووی وەزارەتی دارایی عێراق رایگەیاندبوو، ئەستەمە مووچەی مانگی 12 دابەشبکرێت.