سودانی لە بەریتانیایە و گفتوگۆ لەسەر پرسی پەنابەران دەکات

محەمەد شیاع سودانی سەرۆک وەزیرانی عێراق لە بەریتانیایە، جگە لە ئیمزاکردنی رێککەوتنێکی هاوبەشیی ستراتیجی، گفتوگۆ لەسەر پرسی پەنابەرانیش دەکات.

سودانی بە ئاژانسی فرانس پرێسی وتووە، سەرەتایەکی نوێ بۆ پەیوەندییەکانی نێوان بەریتانیا و عێراق بەتایبەت پەیوەندی ئەمنیی دێتە کایەوە.

لەلایەکی دیکەوە، کییەر ستارمەر سەرۆک وەزیرانی بەریتانیا لە راگەیەندراوێکدا پێشوازیی لە هاریکاریی نێوان وڵاتەکەی و عێراق کرد و رایگەیاند، ئەو هەماهەنگییە سوودی هاوبەشی بۆ هەردوولا لە بوارەکانی ئەمنیی و سەربازیی دەبێت.
راشیگەیاند، پار قەبارەی ئاڵوگۆڕی بازرگانیی نێوان بەریتانیا و عێراق گەیشتووەتە زیاتر لە 14.3 ملیار دۆلار.

هاوکات ستارمەر و سودانی گفتوگۆ لەبارەی رێککەوتنی نوێ بۆ گەڕانەوەی پەنابەران دەکەن، بەگوێرەی ئەو بەرنامەیەی بەریتانیا لە مانگی تشرینی دووەمی ساڵی 2024 رایگەیاندووە، بەناوی بەرەنگاربوونەوەی کۆچی نایاسایی و پاراستنی سنوورەکانی.
ئەوەشخراوەتەڕوو، بەریتانیا بەبەهای زیاتر لە 81 ملیۆن یۆرۆ هاوکاریی عێراقی کردووە بۆئەوەی رێگریی لە کۆچی نایاسایی و باندەکانی قاچاخچییەتی بەمرۆڤەوە بکات.