یەکێتیی ئەوروپا لابردنی سزاکانی سەر سوریا تاوتوێیدەکات

وەزیرانی دەرەوەی یەکێتیی ئەورووپا 27ـ ی  ئەم مانگە، تاوتوێی لابردنی ئەو سزایانە دەکەن لە سەردەمی دەسەڵاتی بەشار ئەسەددا بەسەر ئەو وڵاتەدا سەپێنرا بوون.

کایا کاڵاس، بەرپرسی سیاسەتی دەرەوەی یەکێتیی ئەورووپا لە تۆڕی کۆمەڵایەتی ئێکس ڕایگەیاند: لابردنی سزاکان، 318 بەرپرس و کەسایەتی و 90 ڕێکخراو و کۆمپانیا دەگرێتەوە، کە پێشووتر کاریان لەگەڵ ڕژێمی بەشار ئەسەد کردووە.

کاڵاس دەشڵێت: ئێستا دەبێت ئیدارەی نوێی سوریا پرۆسەی ڕاگوزەری ئاشتییانەو گشتگیر دەست پێبکات کە نەتەوە جیاوازەکان بپارێزێت.

ئەمە لە کاتێکدایە پێشتر بە بەشداری ئەسعەد شەیبانی، وەزیری دەرەوەی سوریا، کایا کاڵاس، بەرپرسی سیاسەتی دەرەوەی یەکێتیی ئەوروپا لە ڕیازی پایتەختی سعودیە، کۆبوونەوەیەک بۆ تاوتوێکردنی دۆخی سوریا بەڕێوەچو و بڕیارە لە کۆتایی ئەم مانگەدا، وەزیرانی دەرەوەی یەکێتیی ئەورووپا بە بەشداری ئەسعەد شەیبانی، بۆ لابردنی سزاکانی سەر سوریا کۆببنەوە.