نەخۆشخانەی هیوا ئاماری توشبوانی شێرپەنجە له‌ سلێمانی بڵاوكرده‌وه‌

نەخۆشخانەی هیوا ئاماری توشبوانی شێرپەنجە لە شاری سلێمانی بۆ ساڵی 2024 رادەگەیەنێت و دەڵێت: "ساڵی پار زیاتر لە 3 هەزار کەس لە منداڵ و گەورە توشی شێرپەنجە بوون"، بەرێوەبەری نەخۆشخانەی هیواش دەڵێت: " زیادبوونی ئامارەکان جێگای ترس و دڵەڕاوکێ نین، بەڵکو دەبێت لایەنە پەیوەندیدارەکان کار لەسەر دەستنیشانکردنی پێشوەختەی شێرپەنجە بکەن".

لە 2024دا 210 منداڵ توشبوی شێرپەنجە بوون
نەخۆشخانەی هیوا لە راپۆرتی ساڵانەی دا لەبارەی تۆماری شێرپەنجە لە راگەیەندراوێکدا رایگەیاندووه‌: "لە ڕاپۆرتی ساڵانەی هۆبەی تۆماری شێرپەنجەی پارێزگای سلێمانی بۆ ساڵی 2024، کۆی ژمارەی تووشبوانی شێرپەنجە بریتیبووە لە (3310) تووشبوی نوێ کە (210) تووشبویان لە تەمەنی منداڵیدان".

"هاوکات لە ساڵی (2023) دا کۆی تووشبوانی شێرپەنجە 3285 تووشبوو بونە کە لە گەورە ساڵان و منداڵان پێک هاتبوون"، راپۆرتەکەی نەخۆشخانەی هیوا وادەڵێت".

پێشتریش د.یاد نەقشبەندی، بەڕێوەبەری نەخۆشخانەی هیوا بە PUKMEDIA ی راگەیاند: "سەرەڕای هەموو ئەو گرفتە داراییانەی كە هەیە، توانیومانە خزمەت گوزارییەكان لەئاستێكی باڵادا پێشكەش بە توشبووانی شێرپەنجە بكەین و گرفتە داراییەكان نەبوونەتە هۆی لاواز بوونی خزمەتگوزارییەكانمان لەسەر ئاستی عیراق و ناوچەكە، بۆیە سوپاس و پێزانین ئاڕاستەی سەرجەم پزیشك و كارمەندانی نەخۆشخانەكەمان دەكەین هەمیشە خەمخۆرو پاڵپشت بوون بۆ چارەسەری نەخۆشانمان".

ئامارەکان جێگای ترس نین
لەلایەکی تریشەوە دەڵێت: "سلێمانی پایتەختی چارەسەری شێرپەنجە و چاندنی مۆخی ئێسکە لەهەرێم و عیراق، زیادبوونی ئامارەکانی تووشبوون بە شێرپەنجە بەردەوام و جیهانییە، لە ساڵی  2019دا دوو هەزار و 675 حاڵەت هەبووە، بەڵام لە ساڵی 2024 سێ هەزار و 310 حاڵەت هەبووە واتە لە ماوەی نزیکەی پێنج ساڵدا هەزار حاڵەت زیادیکردووە، زیادبوونی ئامارەکان مانای ئەوە نییە هاووڵاتییان هەست بە ترس و دڵەڕاوکێ بکەن، بەڵکو دەبێت لە ئاستی باڵا حکومەت و لایەنە پەیوەندیدارەکان کار لەسەر دەستنیشانکردنی پێشوەختەی شێرپەنجە بکەن".

نەخۆشخانەی ھیوا لە ساڵی 2007 لە شاری سلێمانی كراوەتەوە كەسەنتەرێكی تایبەتە بە چارەسەركردنی ھەموو جۆرەكانی شێرپەنجەو سەرجەم خزمەتگوزارییە تەندروستییەكان بۆ نەخۆشخانەكان بێ بەرامبەرە، لەڕووی خزمەتگوزاری پزیشكی و ئاستی بەرزی پزیشكییەوە لەسەر ئاستی عیراق پلەی یەكەمی بەدەستھێناوە بۆ چارەسەركردنی نەخۆشی شێرپەنجە.