د. نەرمین مەعروف: لەکۆی 22 دەروازە کاری 18یان بە ئەلیکترۆنی کراوە

ئەندامێکی ئەنجوومەنی نوێنەرانی عێراق رایگەیاند،  لەکۆی 22 دەروازە کاری  18یان بە ئەلیکترۆنی کراوە.
د. نەرمین مەعروف، ئەندامی ئەنجوومەنی نوێنەرانی عێراق، رایگەیاند، کۆبوونەوەی لیژنەی دارایی ئەنجوومەن بە میوانداریی سەرۆکی دەستەی گشتیی گومرگ و سەرۆکی دەستەی گشتیی باجەکان و وەفدی یاوەریان، لە چوارچێوەی چاودێریکردن و بەدواداچوونی لیژنە بۆ کاری دامەزراوە داراییە فیدراڵییەکان بەڕێوەچوو، بڕی داهاتە نانەوتییە بەدیهاتووەکان لە بودجەی ساڵی 2024 و پلانی گەشەپێدانی ئەو داهاتانە لە ساڵی 2025 تاوتوێکرا.
دەشڵێت، لە کۆبوونەوەکەدا سەرۆکی دەستەی گشتیی گومرگی عێراق باسی لە  کاری دەروازە نێودەوڵەتییەکانی عێراق کرد کە ئێستا لە کۆی 22 دەروازە (جگە لە دەروازەکانی هەرێم) کاری 18 یان بە ئەلیکترۆنی کراوە.
راشیگەیاند، هەر لە کۆبوونەوەکەدا سەرۆکی دەستەی گشتیی باجەکانی عێراق باسی لە رێککەوتنی 13 خاڵیی نێوان هەرێم و حکومەتی فیدراڵ کرد سەبارەت بە پابەندی و رێکارەکانی سەپاندنی باجەکان لەنێوان هەردوو حکومەتدا .