هاوخەمییەکان بۆ کۆچی دوایی عەلی حەوێز ئەندامی پێشوتری مەكتەبی سیاسی یەكێتی

تێكۆشەر و كەسایەتیی دیاری دەڤەری كۆیە و دۆستی دێرینی سەرۆك مام جەلال و ئەندامی پێشوتری مەكتەبی سیاسی یەكێتیی هەڤاڵ (مامۆستا عەلی حەوێز)، بەهۆی نەخۆشیەوە لەیەكێك لەنەخۆشخانەكانی شاری هەولێر كۆچی دوایی كرد.

بەو بۆنە خەمناکەوە چەندین پرسەنامەیە ئاڕاستەی کەسوکار و بنەماڵەی تێکۆشەری دێرین مامۆستا عەلی حەوێز کراوە، کە ئەمە دەقەکانیانە:

سەرۆک بافڵ پەیامێکی هاوخەمی بۆ کۆچی دوایی عەلی حەوێز رادەگەیەنێت

بەڕێزان کەسوکارو بنەماڵەی سەربەرزی مامۆستا عەلی حەوێز 

بەداخ و خەمێکی زۆرەوە، هەواڵی کۆچی دوایی تێکۆشەری کوردایەتی و ئەندامی پێشووتری مەکتەبی سیاسی  هەڤاڵ مامۆستا ( عەلی حەوێز )مان پێگەیشت .
بۆ ئەم خەمە گەورەیە پرسەو سەرەخۆشی ئاڕاستەی کەسوکارو بنەماڵە سەربەرزەکەیان دەکەم و هاوبەشی ماتەمیانم.

مامۆستا عەلی حەوێز، تێکۆشەری سەرەتاکانی شۆڕشی نوێی و یەکێتی و دۆستی دێرینی سەرۆک مام جەلال و خەباتگێڕێکی هەرە دیاری ریزەکانی کوردایەتی بوو، کە مێژووی پاکی و خەبات و رۆڵی لە بزووتنەوەی رزگاریخوازی  گەلەکەمان بۆ هەمیشە جێگای پێزانین و شانازیمانە.

لەخوای گەورە داواکارین گیانی هەڤاڵی کۆچکردوومان بەبەهەشتی بەرین شادبکات، سەبووری و ئارامی بە هەموولایەک ببەخشێت.

دڵسۆزتان 
بافڵ جەلال تاڵەبانی 
سەرۆکی یەکێتیی نیشتمانیی کوردستان


پرسەنامەی مەکتەبی سیاسی یەکێتی

کەسوکار و بنەماڵەی تێکۆشەری دێرین مامۆستا عەلی حەوێز

هەڤاڵانی یەکێتیی و پێشمەرگە قارەمانەکانی شۆڕشی نوێی گەلەکەمان

بەداخ و پەژارەیەکی زۆرەوە ماڵئاوایی یەکجارەکی هەڤاڵ عەلی حەوێز ئەندامی هەرە پێشووتری مەکتەبی سیاسیی یەکێتیی نیشتمانیی کوردستانتان پێڕادەگەیەنین.
مامۆستا عەلی سەرکردە و خەباتێگێرێکی دێرینی گەلەکەمان و یەکێتیی و شۆڕشی نوێ و هەڤاڵ و دۆستی نزیکی سەرۆک مام جەلال بوو.

هەر لەسەرەتای لاوێتییەوە تێکەڵی خەباتی نەتەوایەتی و دیموکراتی گەلەکەمان بوو. لەسەرەتای هەڵگیرساندنی شۆڕشی نوێشەوە بەوپەڕی لە خۆبردوییەوە وەک پێشمەرگە و خەباتێکڕی نەبەز و سەرکردەیەکی دیار و ئەندامی مەکتەبی سیاسیی یەکێتییەکەمان  لەم کاروانە دوور و درێژەی خەباتی پێشمەرگایەتی  و رێکخارەییەدا رۆڵی جوامێرانەی گێڕاوە.

وەک کەسایەتییەکی کۆمەڵایەتی دەڤەری کۆیە و تێکڕای کوردستانیش  خۆشەویستی کۆمەڵانی خەڵک و ناو جەماوەر بوو.


بە داخەوە بە هۆی نەخۆشییەوە دوێنێ شەوی ١٧ لەسەر ١٨ی کانونی دووەمی ٢٠٢٥ لە شاری هەوڵێر لە نەخۆشخانە ماڵئاوایی یەکجارەکی لە هەڤاڵان و دۆستانیکرد و گەیشتە کاروانی نەمران.

بەم بۆنەیەوە مەکتەبی سیاسیی پرسە و سەرەخۆشی ئاراستەی کەسوکار و بنەماڵەی مامۆستا عەلی حەوێز و هەڤاڵانی یەکێتیی و خزمانی کۆیە دەکات.

لە خوای گەورە داواکارین  مامۆستا جێگەی بەهەشتی بەرین  بێت.
یاد و بیرەوەری هەمیشە لە دڵ و دەروونی هەڤاڵەکانی ، فەرماندە و تێکۆشەرانی کوردستاندا زیندووە و ناویشی لە تۆماری شۆرشی نوێ و کاروانی خەباتدا درەوشاوە بێت.

نەمری بۆ مامۆستا عەلی حەوێز و گشت شەهیدان و گیانبازانی یەکێتیی و تێکەڕای شەهیدانی بزووتنەوەی رزگاریخوازی گەلی کوردستان.

مەکتەبی سیاسیی 
یەکێتیی نیشتمانیی کوردستان

پرسەنامەی دەرباز کۆسرەت رەسوڵ

بەداخ و پەژارەیەکی زۆرەوە هەواڵی کۆچی دوایی تێکۆشەرو کەسایەتی نیشتمانپەروەری دەڤەری کۆیە مامۆستا “عەلی حەوێز”مان پێگەیشت. 

رۆڵ و پێگەی مامۆستا عەلی حەوێز وەک تێکۆشەرە سەرەتاییەکانی شۆڕشی نوێی گەلەکەمان بۆ خەباتی سەربەخۆیی لە ڕیزەکانی یەکێتیی نیشتمانیی کوردستان بەرز دەنرخێنین. 

لەناخی دڵمەوە سەرەخۆشی لە خانەوادەو کەسوکاری مامۆستا “عەلی حەوێز” دەکەم و خۆم بە هاوبەشی خەمیان دەزانم.

خوای گەورە مامۆستا عەلی بە بەهەشتی بەرینی خۆی شاد بکات و سەبرو ئارامی بە خانەوادەو دۆست و هاوخەباتانی ببەخشێت.

دەرباز کۆسرەت رەسوڵ
ئەندامی مەکتەبی سیاسی 
یەکێتیی نیشتمانیی کوردستان