روسیا داوای هێوركردنه‌وه‌ی ئاڵۆزییه‌كانی سووریا ده‌كات

هەر لەسەر هەمان پرس، وه‌زیری ده‌ره‌وه‌ی ڕووسیا داوای هێوركردنه‌وه‌ی ئاڵۆزییه‌كانی سووریا و وه‌ستاندنی خوێنڕشتن ده‌كات؛ ئاماده‌یی وڵاته‌كه‌شی بۆ هه‌ر جۆره‌ هاوكارییه‌كی پێویست دووپات كرده‌وه‌.

ماریا زاخارۆڤا، وه‌زیری ده‌ره‌وه‌ی ڕووسیا داوای له‌ ده‌سه‌ڵاتدارانی سووریا كرد هه‌موو توانا و هه‌وڵێكیان بۆ هێوركردنه‌وه‌ی بارودۆخی ئاڵۆزی چه‌ند ناوچه‌یه‌كی ڕۆژاوای سووریا بخه‌نه‌گه‌ڕ.

به‌ پێویستیشی زانی هه‌رچی زووه‌ سنوورێك بۆ خوێن ڕشتنی چه‌ند ڕۆژی ڕابردوو دابنرێت و داواشی له‌ سه‌ركرده‌ كاریگه‌ره‌كانی سووریا كرد بەپه‌له‌ هه‌وڵ بۆ چارەسەری دۆخەکە‌ بدەن.

وه‌زیری ده‌ره‌وه‌ی ڕووسیا ئاماده‌یی مۆسكۆشی دووپات كرده‌وه‌ بۆ هه‌ر جۆره‌ هاوكاری و پشتگیرییه‌ك له‌پێناو كۆتاییهێنان به‌م دۆخه‌ ئاڵۆزه‌ی سووریا.

لەلایەکی دیکەوە، ئۆنجو کەچەلی، وتەبێژی وەزارەتی دەرەوەی تورکیا رایدەگەیاند وڵاتەکەمان لە پاڵپشتیکردنی گەل و ئیدارەی سووریا بەردەوام دەبێت و دژی هەر هەوڵێکن کە ئاشتی و خۆشگوزەرانیی سوورییەکان دەکاتە ئامانج.

وتەبێژەکەی وەزارەتی دەرەوەی تورکیا لەبارەی ڕووداوەکانی لازقیە و پێکدادانی هێزە ئەمنییەکان و پاشماوەکانی رژێمی پێشووەوە ڕایگەیاند، ئێستا هەوڵێکی چڕ خراوەتەگەڕ بۆ ئاسایش و سەقامگیری سووریا.