د. خالید شوانی وەزیری دادی عیراق رایگه‌یاند، لەماوەیەکی کورتی دوای جەژن، یاسای هه‌ڵوه‌شاندنه‌وه‌ی بڕیاره‌كانی رژێمی پێشوو جێبەجێدەکەین و حەق بۆ خاوەنەکانیان دەگەڕێنینەوە، راشیگه‌یاند، کێشەی مووچەی فەرمانبەرانی هەرێمی کوردستان چارەسەربووە"
ئه‌مڕۆ 31ی ئاداری 2025 د. خالید شوانی وەزیری دادی عیراق له كۆنگره‌یه‌كی رۆژنامه‌وانیدا، لەبارەی زەوی جوتیارانی کوردی سنووری کەرکوک و جێبەجێکردنی یاسای هەڵوەشاندنەوەی بڕیارەکانی ڕژێمی پێشوو ڕایگەیاند:" لەماوەیەکی کورتی دوای جەژندا یاساکە جێبەجێدەکەین و حەق بۆ خاوەنەکانیان دەگەڕێنینەوە. "
ده‌رباره‌ی لایەنە ناڕازییەکانی ئەنجوومەنی پارێزگای کەرکوکیش وەزیری داد وتی:" باوەرمان بە پێکەوەژیان و شەراکەتی ڕاستەقینەیە بۆ بڕیاردان لەسەر داهاتووی شارەکە، جەختیشی کردەوە پەراوێزخستن رەتدەکەینەوە و دەستی دۆستایەتی بۆ هەموو لایەک درێژ دەکەین. "
سه‌باره‌ت به کێشەی مووچەی فەرمانبەرانی هەرێمی کوردستانش وەزیری داد رایگەیاند:" كێشه‌كه چارەسەربووە و هیچ کێشە و گرفتێکی سیاسیی و یاسایی نییە."
ئاماژەی بۆئەوەشكرد:" ئەوەی دەمێنێتەوە بریتییە لەوەی حکومەتی هەرێمی کوردستان خۆی لەگەڵ رێنماییە داراییەکانی حکومەتی عێراقدا بگونجێنێت، لەپێناو ئەوەی مووچەی فەرمانبەران جارێکی دیکە دوانەکەوێت."
Copyright © 2020 Kirkuk Tv All Rights Reserved Designed And Developed By AVESTA GROUP