ئەحمەد شەرع داوا لە چەکدارانی عەلەوی دەکات چەکەکانیان دابنێن

ئەحمەد شەرع، سەرۆکی راگوزەری سوریا داوا لە چەکدارانی عەلەویی باکووری رۆژئاوای سوریا دەکات، خۆیان و چەکەکانیان رادەستبکەن بەر لەوەی کار لە کار بترازێت .
ئەحمەد شەرع لە وتارێکدا کە کەناڵی سەرۆکایەتیی سوریا بڵاویکردەوە، بە چەکدارانی عەلەوی دەڵێ، ئێوە هێرشتان کردووەتە سەر هەموو سورییەکان، بەم کارەش تاوانێکی گەورەتان ئەنجامداوە، بۆیە پەلە بکەن و پێش ئەوەی درەنگ بێت چەکەکانتان و خۆتان تەسلیم بکەن .
لە لایەکی دیکەوە، روانگەی سوری بۆ مافەكانی مرۆڤ بڵاویکردەوە، لە پارێزگای لازقییە ئاڵۆزییەكان چووەتە دۆخێكی مەترسیدارەوە و رەشەكوژی بەرانبەر هاوڵاتیانی مەدەنی ئەنجامدراوە و نزیكەی 158 كەس گولـلەباران كراون. کە بەشی زۆریان هاوڵاتی مەدەنین و منداڵ و ژنیشیان تێدایە .
روانگەی سوری ئاشكرایكردووە، 34 ئەندامی سوپای نیشتمانی و ئاسایشی گشتی لە پێكدادانەكاندا كوژراون و 42 كەسی دیكەش لە چەكدارەكانی لازقییە لە دەشتاییەكانی ئەو پارێزگایە و جەبلە كوژراون .