سویسرا سامان و پاره‌كانی به‌شار ئه‌سه‌د بلۆك ده‌كات

سویسرا بڕیاریدا سه‌روه‌ت و سامانه‌كانی به‌شار ئه‌سه‌د، سه‌رۆكی پێشوی سوریا و كه‌سوكاره‌ نزیكه‌كانی بنه‌ماڵه‌و ده‌سه‌ڵاته‌كه‌ی بلۆك بكات.
 
به‌پێی سه‌رچاوه‌ رۆژنامه‌وانییه‌كان ئەنجومەنی فیدڕاڵی سویسرا رایگه‌یاندووه‌:" ڕێوشوێنەکانیان بۆ دڵنیابونەوه‌ لەوەی هیچ پارەیەکی به‌شار ئەسەد و كه‌سه‌ نزیكه‌كانی نه‌چێته‌ دەرەوەی سویسرا، پێش ئەوەی پشکنینی دادوەریی بۆ بکرێت سەبارەت بە سه‌رچاوه‌ی پاره‌كه‌ گرتووه‌ته‌به‌ر"
 
باسی له‌وه‌شكردووه‌ :" "ئەگەر لە ئایندەدا دەربکەوێت ئەو پارەو سامانه‌ سەرچاوەكانیان نایاساییە، سویسرا هەوڵدەدات بۆ گەڕاندنەوەی بە شێوەیەک کە گەلی سوریا سوودیان لێوه‌رگرێت"

 ئەنجومەنی فیدڕاڵی سویسرا ئه‌وه‌شیخستووه‌ته‌ڕو كه‌:" ئەو ڕێوشوێنانەی گیراونەتەبەر، ئه‌و کەسانە دەکەنە ئامانج کە لەژێر دەسەڵاتی تاکڕەویی  بەشار و باوکیدا، پۆستی گشتییان هەبووە، یان ئەوانەی پەیوەندییەکی نزیکی خێزانیی، کەسیی، یان بازرگانییان لەگەڵدا هەبووە".