کۆمسیۆنی نێودەوڵەتیی مافەکانی مرۆڤ: له‌ سوریا كوشتن له‌سه‌ر بنه‌مای مه‌زهه‌بی ئه‌نجامدراوه‌

جیهان
17:21 - 2025-03-09


کۆمسیۆنی نێودەوڵەتیی مافەکانی مرۆڤ راپۆرتێک لەسەر پێشێلکارییەکانی سوریا ئامادەدەکات و رایدەگەیەنێت: "کوشتن و لەسێدارەدان لە سوریا لەسەر بنەمای مەزهەبییە و دەبێت بەزوترین کات لێکۆڵینەوەی بەپەلە و شەفاف لەسەر ئەو پیشێلکارییانە بکرێت و ئەو کەسانەی بەرپرسیارن لەو تاوانانە سزا بدرێن"، روانگەی سوریاش ئاشکرایدەکات لە چوار رۆژی رابردوودا زیاتر لە 1000 کەس لە سوریا کوژراون کە زۆربەیان هاووڵاتی مەدەنین".

بەهۆی گرژی و ئاڵۆزییەکانی چوار رۆژی رابردووی سوریاوە تا ئێستا زیاتر لە 1000 کەس کوژراون کە زۆربەیان خەڵکی بێچەک و مەدەنین،  بەڕێوەبەری ڕوانگەی سورایش رایدەگەیەنێت:"  لەو ژمارەیە زیاتر لە 745 كەس هاوڵاتی مەدەنی بوون و  لە كەنار ئاوەكانی سوریا كوژراون كە دەستیان لە شەڕەکەدا نەبووە و دەیان هەزار ماڵ تاڵانکراون و سوتێنراون".

ڕامی عەبدولڕەحمان بەڕێوەبەری ڕوانگەی سوری بۆ چاودێری مافەکانی مرۆڤ ئەمڕۆ 9ی 3ی 2025 لە دیدارێکیدا لەگەڵ  كەناڵی ئاسمانی BBC عەرەبی ڕایگەیاند:” ئاماری سەرەتایی کوژراوانی کەناراوەکانی سوریا لە پێنجشەممەی ڕابردوەوە تائێستا گەیشتوەتە هەزار و 18 کەس  و لەو ژمارەیە 745 كەسیان هاوڵاتی مەدەنی  و بێچەک بوون کە کوژراون بە جۆرێک نە دەستیان لە شەڕەکەدا هەبووە و نە پەیوەندییشیان بە ڕژێمی پێشوەوە هەبوو و نە لایەنگری ئەسەدیش بوون".

 بەگوێرەی نوێترین زانیاری روانگەی سوری لە چوار رۆژی ئاڵوزییەکان دا  125 ئەندامی هێزە ئەمنییەکان و 150 چەکداری عەلەوی کوژراون کە لایەنی شەرەکەن.

ڕامی عەبدولڕەحمان دەشڵێت:" ژمارەی قوربانیەكان زۆر لەو ژمارەیە زیاترن  چ ئەوانەی لایەنی شەڕەکەن، چ ئەوانەی هاوڵاتین و بوونەتە قوربانی، چونکە بەهۆی هەوڵی شاردنەوە و ناشتنی تەرمەکانەوە زانیاری ورد لەبەردەست نییە".

" ئەو ناوچانە  شاهیدی کوشتن و تاڵان و سوتاندنی بەرفراوان بونەتەوە و لە چەند گوندێک لە جەبلح و بانیاس ڕاستەوخۆ هێرشكراوتە سەر ماڵەکان و پێش سوتاندنیان، دزی و تاڵانی کراون   هەروەها دەیان هەزار ماڵ تاڵانکراون و سوتێنراون، هەروەها ئەو چەکدارانەی کۆمەڵکوژییەکانیان ئەنجامداوە دانیشتوی کەناراوەکانی سوریا نەبون، بەڵکو لە پارێزگاکانی دیکەوە هاتون  یاخود لە نەتەوە بیانییەکانی ئۆزبەکستان و چیچان و ئاسیای ناوەڕاستن". بەڕێوەبەری ڕوانگەی سوریا وایوت.

بابەتی لێکچو

Copyright © 2020 Kirkuk Tv All Rights Reserved Designed And Developed By AVESTA GROUP