تڕەمپ: ئێران دەستی ئاشتی رەتبکاتەوە زیانی گەورە دەبینێت

سەرچاوەیەکی ئێرانی دەقی نامەکەی دۆناڵد ترەمپ بۆ ڕێبەری ئێران ئاشکرا دەکات، ترەمپ دەڵێت: دەرفەتێکی زێڕین بۆ کۆتاییهاتن بە ململانێکان لەبەردەستە و هۆشدارییش دەدات لەوەی تاران دەستی ئاشتی رەتبکاتەوە چونکە زیانی گەورە دەبینێت.
محەممەد ساڵح سدیقیان، بەرێوەبەری ناوەندی عەرەبی بۆ لێکۆڵینەوەکانی ئێران لە پلاتفۆڕمی ئێکس دەقی نامەکەی بەبێ دەستکاریکردن بۆ زمانی عەرەبی وەرگێراوە تێیدا، دۆناڵد ترەمپ لە سەرەتای نامەکەیدا دەڵێت: ئێستا کاتی ئەوە هاتووە واز لە دوژمنایەتی بهێنرێت و لاپەڕەیەکی نوێ بۆ ئاڵوگۆڕی هاوکاری و ڕێزگرتنی یەکتر بکرێتەوە.
ترەمپ ئاماژەی بۆ ئەوەشکردوە، هەنگاوێکی گەورە بەرەو ئاشتی و کەمکردنەوەی گرژیەکان گیراوەتەبەر، لە ڕێگەی دانوستانەوە دەتوانرێت گەمارۆکان هەڵبگیرێن و ئابووری ئێران بەهێز بکرێت و دەرگاکانی هاوکاریی لە نێوان هەردوو وڵات بکرێنەوە.
سەرۆکی ئەمریکا لە کۆتایی نامەکەیدا هۆشداریش دەدات لەوەی ئەگەر ئەم دەستپێشخەرییە ڕەتبکرێتەوە و ئێران ڕێگای پەرەسەندن و پشتیوانی بەردەوامی ڕێکخراوە تیرۆریستییەکان و سەربازییەکان هەڵبژێرێت، ئەوا واشنتۆن وەڵامدانەوەی یەکلاکەرەوە و خێرای دەبێت.