ریاڵ مەدرید بارسێلۆنا هەراسان دەکات !

ریاڵ مەدرید بارسێلۆنا هەراسان دەکات !
ئاکۆ بیبانى 
هەفتەیەکى نوێ لە ڕکابەریەکانى لالیگا دەستیپێکردوە، یانە گەورەکانیش هەوڵەکانیان چڕدەکەنەوە لە پێناو ئەوەى پێگەکانى خۆیان لەدەستنەدەن ، بارسیلۆنا و ریاڵ مەدرید نایانەوێت بەهیچ جۆرێک خاڵ لەدەستبدەن ، لەو چوارچێوەیەدا و لەمیانى یارییەکانى هەفتەى 30 یەمینى خولى یانەکانى ئیسپانیا ، ئێوارەى ئەمرۆ و سەعات 05:15 ، یانەى ریاڵ مەدرید لە نێو یاریگا و لەبەردەم هاندەرەکانى میواندارى یانەى فالانسیا دەکات ، یاریزانانى قەڵاى سپی بەدەرونێکى ئارامەوە دەچنە یاریگاوە!  بەو پێیەى گەیشتوون بە یارى کۆتایی جامى شاى ئیسپانیا .
 لە ئێستاشدا تیپەکە لە دۆخێکێکى بەرزى هونەریدایە و مپاپێش لوتکەى ئاست بەرزى پێشکەش دەکات ، لەلایەکى دیکەوە ڕکابەرەکەیان کە یانەى فالانسیایە دۆخى زۆر خراپە و لە پلەکانى دواوەى ریزبەندییە.
ریاڵ مەدرید بۆ ئەو یارییە بێ بەش دەبێت لەتواناکانى ( کۆرتوا  - میلیتاو – سیپایۆس – مێندى – کارفاخاڵ ) .

بارسێلۆناى پێشەنگى ریزبەندى خولى یانەکانى ئیسپانیا بە باشترین کاتەکانى تێپەڕدەبێت ، ئێستا تیپەکە دۆخێکى جێگیرى هەیە ، ئەستێرەکانى لە لوتکەى ئاست بەرزیدان ، یامال و رافینیا لە باڵەکانەوە دۆزەخ بۆ ڕکابەرەکانیان دادەگیرسێنن ، لیفاندۆفیسکى و فێران تۆرێس بوون بە دێوەزمەى گۆڵپارێزان ، بارسا بەدوای قایمکردنى پێگەى خۆى دەگەڕێت لە پێشەنگى ریزبەندى و نایەوێت هیچ خاڵێک لەدەستبدات ، رکابەرەکەى ئەمجارەیان ئاسان نیە ، بێتیس تاکو دواین ساتەکان دەجەنگێت ، کۆڵنادات ، خۆى بەدەستەوە نادات ، بۆ یارییەکەى ئەمشەو بێ بەش دەبن لە تواناکانى ئیسکۆى کاپیتان و سەرکردە .

پلیگرینى: 
یاری بەرامبەر بە بارسیلۆنا زۆر قورسە ، بەڵام ئێمە ئاڵاى سپى هەڵناکەین ، تیپێکى بەهێزمان هەیە ، بەدەستهێنانى خاڵ بەرامبەر بە بارسێلۆنا قورس نیە ، بارسێلۆنا تیپێکی گەورەیە، بەڵام نابێت بترسین، چونکە لیگانیس و لاس پاڵماس لەم وەرزەدا لە یاریگای مۆنتخویک خاڵیان لێ وەرگرتووە، لە یارى چونیشدا ئێمە یەکسانبووین ، ئیسکۆ یاریزانێکى گەورەیە بەڵام ئەنتۆنى وەک جێگرەوەیەکى گونجاو دەردەکەوێت 

هانسى فلیک :
بەراستى یارییەکى زۆر قورسە ، ئێمە لەسەر رێگایەکى راستین ، لە جامى شاى ئیسپانیا گەیشتوین بە یارى کۆتایی ، هەوڵدەدەین بە ئاسودەیی یارى بکەین ، هیوادارم ئەنجام و ڕووداوەکانى یارییەکە پێچەوانەى ویستى ئێمە نەبێت ، ریاڵ بێتس تیپێکى باشە و تاکو کۆتایی خۆى بەدەستەوە نادات. 

بارسێلۆنا پێشەنگى ریزبەندى خولى یانەکانى ئیسپانیاى داگیرکردوەو خاوەنى 66خاڵە ، نایەوێت بەهیچ جۆرێک پاشەکشە بکات ، هەرچى یانەى ریاڵ بێتسە شەرى بەدەستهێنانى بلیتى یارییەکانى چامپیۆنزلیگى داهاتوو دەکات ، لە ئێستاشدا خاوەنى 47 خاڵەو پلەى شەشەمى گرتوە .