کۆمسیۆن وادەی تۆمارکردنی ناوی حزب و کاندیدەکانی راگەیاند

کۆمسیۆنی باڵای هەڵبژاردنەکانی عیراق کاتی تۆمارکردنی هاوپەیمانێتی و حیزب و لیست و کاندیدە تاکەکانی بۆ هەڵبژاردنی ئەنجومەنی نوێنەرانی عیراق دیاریکرد.
كۆمسیۆنی هەڵبژاردنەکان  رۆژی 15/4/2025  تاوەکو 4/5/2025 دیاریکردووە بۆ تۆمارکردنی هاوپەیمانێتی و حیزب و لیست و کاندیدە تاکەکان کە ئارەزووی بەشداریکردنییان لە هەڵبژاردنی ئەنجومەنی نوێنەرانی عیراقدا هەیە.
رۆژی پێنجشەممەی رابردوو نوسینگەی راگەیاندنی سەرۆکی ئەنجومەنی وەزیرانی عیراق رایگەیاند: ئەنجومەنی وەزیران کۆبوونەوەیەکی بە سەرۆکایەتی محەمەد شیاع سودانی سەرۆکی ئەنجومەنی وەزیران ئەنجامدا و بڕیاریدا رۆژی 11-11-2025   هەڵبژاردنی ئەنجومەنی نوێنەرانی عیراق ئەنجام بدرێت.
هاوکات جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عیراق راگەیاند: كۆمسیۆن ئامادەیە لەو وادەیەی كە ئەنجومەنی وەزیران بۆ ئەنجامدانی هەڵبژاردنی ئەنجومەنی نوێنەران دیاریكردووە پڕۆسەی هەڵبژاردن بەڕێوەببات