وەزارەتی تەندروستی داوای توندتركردنی ڕێككارەكانی فرۆشتنی گۆشتی سوور دەكات

وەزارەتی تەندروستیی حكومەتی هەرێمی كوردستان بە نووسراوێكی ڕەسمی، داوای هاوكاری لە وەزارەتی ناوخۆ دەكات بۆ جێبەجێكردنی چەند ڕێككارێك سەبارەت بە سەربڕینی ئاژەڵ و فرۆشتنی گۆشتی سور.
وەزارەتی تەندروستی، نووسراوێكی ئاراستەی وەزارەتی ناوخۆ و گشت پارێزگا و ئیدارە سەربەخۆكان كردووە و داوا دەكات بەمەبەستی كۆنترۆڵكردنی نەخۆشیی تای خوێنبەربوون و پاراستنی هاووڵاتییان، داوای هاوكاری و جێبەجێكردنی چەند خاڵێك دەكات.
وەزارەتی تەندرووستی داوای کردووە سەربڕینی ئاژەڵ لە ماڵان قەدەغە بکرێت و گۆشتفرۆشەكانیش كەلوپەلی خۆپاراستن لەبەر بکەن، بەتایبەت لەدەستكردنی دەستكێش و جلی تایبەت لەكاتی مامەڵەكردن لەگەڵ ئاژەڵ یان گۆشت و خوێنەكەی، ئەگەر سەرپێچیش بکەن بە توندی سزا دەدرێن.
هەر لە داواکارییەکانی تەندرووستیدا هاتووە پێویستە ئاژەڵ دوو هەفتە پێش سەربڕینی چارەسەر كرابێت  و دوای سەربڕینیشی شوێنەكە پاكبكرێتەوە.
وەزارەتی تەندرووستی هەرێم داواشی لە هاوڵاتییان کردووە گۆشتی سوور لە شوێنی ڕێپێدراو بكڕن و دەستکێش لەدەست بكەن و ئاگادار بن دەستیان هیچ برینێكی نەبێت لەكاتی دەست لە گۆشتدان.