سەرۆک بافڵ جەلال تاڵەبانی لە دیدارێکدا بەڕاشکاوانە باسی لە پرسە ناوخۆیی و دەرەکییەکان کرد

بافڵ جەلال تاڵەبانی سەرۆکی (ی.ن.ک)، لە دیدارێکی تایبەتدا لەگەڵ کوردسات نیوز، بە ڕاشکاوانە باسی لە چەندین  پرسی ناوخۆیی و دەرەکیی کرد.
سەرۆک بافڵ رایگەیاند، بەڵێنەکانی هەڵبژاردن لە کابینەی نوێی حکومەتی هەرێمی کوردستاندا جێبەجێدەکەن، هاوکات دیدو بۆچوونی خۆی لەسەر دۆخی هەرێمی کوردستان و پەیوەندی یەکێتی لەگەڵ لایەنەکان خستەروو.
وتیشی: یەکێتی هەمیشە بەرز دەبێت و رۆژ بە رۆژ بەرزتر دەبێت و ئەوەی دەیڵێم دەیکەم، سیاسەت بە جۆرە کلاسیکییەکە ناکەم.
پەیوەست بە پەیوەندییەکانی یەکێتیی نیشتمانیی کوردستان لەگەڵ لایەنە عیراقییەکان، سەرۆک بافڵ رایگەیاند:" پەیوەندییمان لەگەڵ زۆرینەی لایەنەکانی عیراق زۆر باشە ،چەندین جار کێشەی مووچە هەبووە، کاک قوبادی چارەسەری  کردووە".
دووپاتیشی کردەوە:" زۆر ئاساییە لە کوردستان یەکتر بدڕێنین، بەڵام دەبێت لە بەغدا بەشێوازێکی دیکە سیاسەت بکەین و  کورد یەکڕیز نەبێت ناتوانین گەلەکەمان بپارێزێت".
پەیوەست بە ئازادی رادەربڕین و ناڕەزایەتییەکان، سەرۆکی یەکێتی ئاماژەی بەوەکرد:" سلێمانی ئەگەر ئازادی رادەربڕینی تێدا نەبێت، هەڵە دەکەین، ئێمە دەبێت گوێ لە گەلی خۆمان بگرین و واجبی منە کە کۆببمەوە لەگەڵ ئەوانەی کێشەیان هەیە و ناڕازین، بەڵام یەکێتی چەند بەهێز بێت،ئەوەندە باشتر دەتوانین یارمەتی خەڵکی خۆمان بدەین
هاوکات باسی ژیانی تایبەتی خۆی و قوباد تاڵەبانی و ماڵ و منداڵەکانیشی کرد و وتی: ئەگەر سەرۆکی یەکێتی نەبوومایە، حەزمدەکرد رێکخراوێکی خێرخوازیی دروستبکەم، دەمویست هاوکاری منداڵان بکەم .
سەرۆک بافڵ جەلال تاڵەبانی وتیشی: هیچ پەیوەندییەکم لەگەڵ کاک لاهور نەماوە و قەتیش نابێت.