یەکەم کاروانی حاجییانی هەرێمی کوردستان بەرەو سعودیە بەڕێکەوت

یەکەم کاروانی حاجییانی هەرێمی کوردستان لە رێگەی وشکانییەوە بەرەو سعودیە بەڕێکەوتن، رۆژی 19ی ئەم مانگەش یەکەم کاروانی حاجییان بە رێگای ئاسمانی دەچنە ئەو وڵاتە .
شێخ نیاز راغب نەقشبەندی، بەرێوەبەری گشتیی حەج و عومرەی هەرێمی کوردستان رایگەیاند، ئەمڕۆ یەکەم کاروانی حاجییانی سنووری پارێزگاکانی سلێمانی، هەڵەبجە و ئیدارەی گەرمیان و راپەڕینیان بەڕێکردووە بەرەو سعودیە کە ژمارەیان زیاتر لە 700 کەس بووە.
وتیشی، سبەی حاجییانی سنووری پارێزگاکانی هەولێر و دهۆکیش بەڕێگای وشکانی بەڕێدەکەن و رۆژی 19ی مانگیش یەکەم گەشتی ئاسمانی حاجیانی هەرێمی کوردستان دەستپێدەکات و رۆژی 28ی مانگیش کۆتا گەشتی حاجییانە بەڕێگەی ئاسمانی.
ئەمساڵ کۆی حاجییانی هەرێمی کوردستان پێنج هەزار و 136 کەسە، لەو ژمارەیەش نزیکەی 300 کەسیان تەمەنیان سەروو 70 ساڵە
بەگوێرەی بەڕێوەبەرایەتیی حه‌ج و عومره‌ی هه‌رێمی كوردستان، حاجییان بڕی دوو هه‌زار دۆلاریان به‌ نرخی رەسمی کە 132 هه‌زار دینارە بۆ دەگۆڕدرێتەوە لەکاتێکدا لە بازاڕەکان هەر 100 دۆلارێک 142 هەزار دینارە.