دەمپارتی پەروین بوڵدانی بۆ جێگری سەرۆکی پەرلەمانی تورکیا دیاریکرد

دەم پارتی پەروین بوڵدانی وەک بریکاری سەرۆکی پەرلەمانی تورکیا لە شوێنی سری سورەیا ئۆندەر دیاریکرد.
دەم پارتی لە بارەگای پارتەکەی کۆبوونەوەیەکی دوور لە چاوی میدیا کرد و پەروین بوڵدان، پەرلەمانتاری پارتەکەی لە بازنەی وان و ئەندامی وەفدی ئیمراڵیی بۆ پۆستی بریکاری سەرۆکی پەرلەمانی تورکیا دیاریکرد.
 بەمشێوەیەیش ئەندامەکەی وەفدی ئیمراڵی، جێگەی سڕی سورەیا ئۆندەر، بریکاری پێشووی سەرۆکی پەرلەمانی تورکیا دەگرێتەوە کە رۆژی 3-5-2025 بەهۆی لاوازبوون و لەکارکەوتنی بەشێک لە ئەندامانی جەستەی، لە نەخۆشخانەیەکی ئیستەنبووڵ گیانی لەدەستدابوو.
 سەرۆکی پەرلەمانی تورکیا چوار بریکاری هەن، بەڵام بەهۆی کۆچی دوایی سری سورەیا ئۆندەر سێیان ماونەتەوە، ئەوانیش: بەکر بۆزداغ، پەرلەمانتاری ئاکپارتی؛ گوڵیزار بیچەر کاراجا، پەرلەمانتاری جەهەپە و جەلال ئادان، پەرلەمانتاری مەهەپەن.