ئیلۆن مه‌سك سه‌رۆكی ئه‌مریكا به‌ تۆمه‌تێكی ئابڕوبه‌رانه‌ تۆمه‌تبار ده‌كات

ناکۆکی و ململانێ و شه‌ڕه‌ قسه‌ی توندو ئاشکرا لە نێوان دۆناڵد تره‌مپ سەرۆکی ئەمریکا و هاوپەیمانی پێشووی، ملیاردێر ئیلۆن ماسک ده‌ستیپێكردووه‌و لە دوو هاوڕێ و هاوکارەوە، بوونه‌ بە دوو نەیاری سەرسەخت و یه‌كتر تۆمەتباركردن، ئه‌ویش دوای ئه‌وه‌ی لە چەند ڕۆژی ڕابردوودا، مەسک وەک وەزیری کارامەیی و ڕاوێژکاری باڵا لە ئیدارەی ترەمپ، کابینەی حکومەتی بەجێهێشت.

سەرەتای ناكۆكییه‌كان كاتێك ده‌ستیپێكرد كه‌، دۆناڵد ترەمپ باجی خستە سەر ئۆتۆمبێلی کارەبایی و بەشێکی دیکە لە کاڵاکانی ئەمریکا، لە بەرامبەرشدا، مەسک رەخنەی له‌و سیاسەتە گرت و دژی وەستایەوە و رایگه‌یاند: "ئەم هه‌نگاوه‌ی تره‌مپ دەبێتە هۆی داڕووخانی ئابووری ئەمریکا".

مەسک له‌ دوایین پۆستی له‌ (ئێكس) تره‌مپ به‌ تێوه‌گلان لە دەستدرێژیی و بازرگانیی بە منداڵانەوە تۆمه‌تبار ده‌كات و رایگه‌یاندووه‌: "ناوی ترەمپ لە فایلەکانی ئیسپێستین هەیە" ، دۆسێی ئێسپێستین: دۆسیەیەکی ئابڕووبەرانەیە، كه‌ وه‌ك باس ده‌كرێت ژمارەیەک سەرمایەدار بە بازرگانیکردن و دەستدرێژیی بۆسەر منداڵان تۆمەتبارن"

ماسك ده‌شڵێت:" ئه‌گه‌ر پشتیوانییه‌كانی ئه‌و نه‌بواییه‌ تره‌مپ له‌ هه‌ڵبژاردنه‌كان ده‌یدۆڕاند."